最後1week

07-11-2009 (39weeks)

係咪我個肚太舒服, 太好住呢, 搞乜佢地兩兄弟都唔願出世架呢?? 哈哈~ 如果唔係改咗預產期, 今日就變相係Owais過期居留第1日喇...........

其實今胎mama已經定好多, 無再好似之前陀蝦仔時, 日日都好心急, 好緊張咁等佢地出世(但朋友們話我太老定, 哈哈~~), 亦無再為佢地遲遲唔出而亂諗嘢, 唔開心, 而家mama抱住嘅心態就係, 唔駛急, 總有一日要出嚟, 又睇吓Owais你想自己出, 定係好似Yusuf(蝦仔)咁, 比醫生趕你出嚟啫..........

蝦仔: [Owais呀~ Owais~~ mama個肚我都住過, 我都知入面係幾咁舒服, 幾咁好住, 不過我地等緊你出嚟呀, 你就乖乖快d出嚟同我一齊玩啦~~]

今日已經係39w喇, 即距離真正嘅預產期得番7日, 之前C+醫生已經估我唔會早生, 仲預計我今胎會貼近預產期前後先出世, 哈哈~ 嚟緊嘅禮拜6就係我預產期, 就快喇就快喇~~

不過到現時為止, 都係得我一個人湊住蝦仔, 所以好多朋友都問我, 如果作動時點算?? 邊個幫我睇住仔仔?? 哈哈~ 無呀~~ 阿bu, 阿bu細佬, 婆婆, ee個個都要番工, 無人幫到我架, 所以好多嘢都係睇當時情況, 因為佢地假唔多, 我又唔知幾時生得, 無奶油叫佢地請假陪我等, 咁嘥料架嘛~~ 就算我入院我都唔想佢地請假, 因為對大家都無幫助, 不如留番d假, 等我出院後有得休息吓仲好啦~~ 係咪?!?!

咁所以我打算, 如果我係見紅, 陣痛先就最好, 咁我都可以喺我忍得到嘅時候, 執埋d嘢call阿bu番嚟同我地去醫院(雖然走佬袋已經執好, 但情況准許的話, 我都想沖個涼, 幫仔仔換件衫先出去), 但如果穿水先, 咁就唔等得喇, 就算唔call白車, 我都要嗱嗱林同仔仔去醫院先, 阿bu自己趕過去接仔仔, 因為穿水可大可小, 唔知等唔等得嘛~~

不過e d都唔輪到我話事, 所以一切都要睇當時情況, 考我即場反應, 希望一切順順利利, 樣樣得心應手啦, 哈哈~