求救!!

30-11-2009

真係唔知點做先好, mama覺得好攰, 好唔開心呀~ 所以都唔理仲有好多篇blog未打, 都要打咗e篇blog呻一呻先, 睇吓有無其他mama可以比d意見我啦~~

其實之前已經打咗篇blog, 講及Owais出世後, 蝦仔因為呷醋, 搞到不單只扭多咗, 仲好多嘢都大倒退(不過篇blog未出), mama知道e個係一個過渡期, 所以都盡量顧咗蝦仔先, 盡量令佢覺得, Owais嘅存在, 唔會影響mama對佢嘅關愛..........

而且就算佢扭, 都盡量唔打唔鬧, 寧願慢慢同佢講清楚, 解釋清楚, 不過如今Owais出世已經半個月有多喇, 但情況依舊, 甚至mama只係對喊緊嘅Owais多望一眼, 蝦仔都即時扭我出廳, 唔想我多理Owais一吓............

但今日呷醋嘅蝦仔, 竟然開始傷害Owais起嚟, 喺Owais身邊尖叫, 左碌右撞, 襯mama不覺, 用指甲摑Owais腳仔, 甚至喺mama阻止嘅情況下, 仍然要抆Owais嘅頭髮............

講道理唔聽, 鬧又無用, 甚至打佢手仔都唔怕, 越叫佢唔好做, 佢偏更加要做, mama好嬲好嬲呢, 結果兩個仔一齊喊, 蝦仔喊得好悽慘, 望我嘅眼神, 好似我唔再錫佢咁, mama都唔知可以點做...........嗚~~ mama都想喊呢~~

快速冷靜番自己情緒之後, 都唔理得個細住, 嗱嗱林抱起蝦仔, 慢慢同佢傾, 講比佢知mama唔想打佢鬧佢, mama好愛佢, 不過佢咁做真係唔啱...........但蝦仔推開我, 之後仲好掘強咁將頭擰埋一邊.............嗚嗚嗚~~嗰刻mama好傷心呢~~

再繼續同蝦仔傾計, 慢慢蝦仔都冷靜番落嚟, 不過佢仍然唔覺得自己做錯, 縱使Owais當時仍然喊得悽慘, 蝦仔都唔比mama放開攬住佢嘅雙手, 仲扯mama出廳, 唔比mama去理Owais................

mama真係好無助, 嗰刻我真係唔知點做, 軟又唔得, 硬又唔得, 蝦仔仲變本加厲........忍唔住打比阿bu, 喊咗出嚟, 唉~ 因為我真係無哂辨法, 我好唔開心呀~~

(試過好惡打鬧過蝦仔, 但佢好悽慘喊完之後, 情況依舊, 仲喊住都要搞Owais, 軟硬都做暈,  情況都未見改善, 我真係無哂辦法喇~~)