呷醋蝦仔

16-11-2009

慘喇~ 我諗我真係整襯喇, 條尾龍骨最尾個位好痛, 下面會陰好痛, 都莫講話抱b喇, 就連企耐d都唔得喇~~

話説Owais出世後, 雖然蝦仔成日都主動要抱b, 錫b, 不過mama開始發現, 一向痴身嘅仔仔, 更加痴我痴得勁咗呢, 尤其係我抱緊Owais嘅時候.............

其實出院之後, mama已經盡量減少抱Owais嘅時間同次數, 只係餵奶時先抱一抱, 其他時間都係顧大多過顧細, 盡量希望蝦仔唔會覺得失寵, 亦都唔想蝦仔覺得, Owais嘅存在會分薄咗mama同阿bu對佢嘅愛同關心.............

不過蝦仔真係呷醋呢, 每每佢見到mama抱起Owais餵奶, 佢就會扭mama抱, 扭mama開奶, 又或者扭mama去東去西, 就算無事都好, 都寧願mama攬住佢, 唔比mama行開, 甚至唔比mama去廁所............

直到尋晚臨瞓前, mama又再抱起Owais餵奶, 已經好眼嘅蝦仔見到之後, 就不斷扭要mama放低baby, 改為抱佢瞓覺, 雖然當時Owais仲未食完奶, 不過mama都交低咗Owais比阿bu, 再坐喺床邊抱蝦仔瞓覺先, 但係蝦仔扭得好緊要呢, 不斷扭要mama企起身, 邊行邊抱咁氹佢瞓.............

雖然由出院到而家, mama已經再三同仔仔解釋, mama身體痛痛, 只可以坐低時抱抱, 唔可以再抱起佢行行企企, 而蝦仔雖然間唔中都會扭吓, 不過只要mama有抱住佢, 都總算免強過到骨, 但尋晚扭眼瞓嘅蝦仔, 就唔再咁易話為喇~~

不斷喊, 不斷扭, 就連mama抱住坐低都唔得, 係要mama將佢成個人抱起, 邊行邊抱氹佢瞓, 任憑我同阿bu軟硬兼施都搞唔掂, 最終mama抱起咗蝦仔.............

哇~~ 只係10秒左右, mama覺得有d唔妥喇......... 下面會陰好痛, 好似有舊好大好重嘅石頭, 不斷向下壓咁, 扯到個會陰好痛好痛, 免強再行多幾步, 哇~~ 好似生仔咁痛喇, mama邊行邊喘氣, 只不過抱咗半分鐘左右, mama痛到頂唔順, 嗱嗱林坐番床邊抖抖..........

點知一坐低, 蝦仔又發顛喇, 嗚嗚~~ mama好痛呀, 但蝦仔乜都唔理, 起勢咁扭, 起勢咁踢, mama再次抱起蝦仔起身...............

今次半分鐘都無, 我已經好痛喇, mama又再偷雞坐低, 如事者重覆咗4次, 每次行嘅時間越嚟越短, 半分鐘.....20秒........10幾秒........

最後一次, 起身行咗幾步之後, 想轉身坐番落床都唔得, 痛到我跪咗喺床邊, 連企番起身嘅力都無, 好痛好痛呀~~

嚇到阿bu即時抱我上床, 哇~~ 下面痛到痺哂, 好辛苦呀~~ 初初諗住抖抖會好番d, 但今日發覺莫講話抱蝦仔喇, 就連抱起Owais, 甚至乜都唔攞唔抱, 只係行耐少少, 企耐少少, 下面會陰都開始越嚟越痛, 好辛苦呢~~

婆婆話可能係因為抱蝦仔之後, 搞到子宮下墜呀~ 唔好呀, 好大獲架, 希望抖多幾日之後會好番啦~~ 希望快d好番呀~~