兩父子私底話...

2歲後嘅蝦仔, 對語言掌握得好快, 好多詞彙講一兩次就記得, 亦有好多第一次由仔仔口中講出...........

就好似前幾日一樣, 臨瞓前嘅仔仔要求阿bu開奶奶, 當阿bu攞住支奶入房比仔仔嘅時候, 仔仔望一望阿bu, 講咗句 :[ 等陣先!]

阿bu當堂呆一呆, 哈哈~ 原來仔仔想自己瞓好床仔, 自己整好枕頭, 冚好被先飲奶, 所以未整好之前, 就叫阿bu等陣先, 哈哈~~ 阿bu好驚訝咁對啱啱入房嘅mama講 : [佢頭先竟然講等陣先呀, 第一次聽到呀~~]

哈哈~ 久而久之阿bu就投訴話: [哎呀~ 仔仔越講越多中文喇, 咁落去, 仔仔就唔識講我d話喇~~]

基本上阿bu係用巴基斯坦話同仔仔溝通, 而仔仔回應阿bu嘅時候, 阿bu亦會要求仔仔講巴基斯坦話, 但由於mama同仔仔嘅相處時間較多, 所以仔仔嘅廣東話係比較叻..............

上個禮拜阿bu連放兩日假, 兩日以嚟阿bu不斷同仔仔說東說西, 阿bu仲話如果keep住咁落去, 不出一個禮拜, 仔仔d巴基斯坦話一定突飛猛進, 哈哈~ 其實又駛乜1個禮拜吖~~ 而家佢地兩仔爺講嘅嘢, 我已經唔係好明喇~~

哈哈~ 仔仔呀仔仔~ 你有無咁勁呀, mama同阿bu一齊咁多年, 雖然都聽得明少少巴基斯坦話, 但你只得2歲, 所識嘅巴基斯坦話已經比mama多喇, 好多時我仲要問番阿bu, 究竟仔仔同阿bu講緊乜, 哈哈~ 你地兩仔爺, 以後傾咩密計mama都唔知喇.................

其實仔仔好叻, 佢識得同mama講嘢時用中文, 同阿bu講嘢時又會轉番做巴基話, 不過阿bu識講中文, 所以我同仔仔間嘅對話佢完全明白, 而mama唔識巴基斯坦話, 所以仔仔同阿bu間嘅對話, 就好似佢地兩仔爺嘅私底話一樣, 因為mama唔識聽呀~~

哈哈~ 睇嚟若我要同仔仔講私底話, 要講國語先得喇..........(不過mama國語唔叻, 都係等仔仔你大個學識再教我啦~~)