轉捩點

其實e篇blog想打好耐, 但經過一輪假期, 再update哂d舊blog先醒起........原來自己仲未打e篇blog, 不過e篇blog可能係蝦仔人生其中一個少少轉捩點, 所以都係要好好記低.........

打之前要好好多謝樂樂仔mami (阿mui), 有次佢打比我問我近況時, 大家閒談間傾到蝦仔飲食情況, 依然係mama我擔心嘅一大問題, 對方可能只係一個隨口嘅提議, 但估唔到真係對蝦仔有幫助, 哈哈~ 所以話好多時一句簡單嘅說話, 都可以幫到人架~~

話說蝦仔一向以奶為主糧, 唔多好固體食物, 尤其係粥粉麵飯, 真係肯食兩啖都已經好好, 而且仔仔對於飲品方面, 任mama煲湯定糖水, 都係象徵式咁飲幾口就算, 所以mama要無時無刻咁提佢多飲水, 雖然仔仔每次都會飲, 但真係每次幾啖就算, 水份依然唔夠.....................

好耐之前都聽過, 奶粉熱氣, 多食會燥熱, 所以應該多飲水, 多食生果, 或者多飲湯水, 糖水, 開奶茶, 但樣樣仔仔都唔好, 點算呢?? 久而久之仔仔就成日都無便便, 一便就vi哇鬼叫, 因為d便便好硬呢, 唔痛就假喇.................

但仔仔飲水唔多又有咩辦法喎, 結果阿mui提議, 既然仔仔鍾意飲奶, 沖奶時就多水少奶, 等佢有多d水落肚........

雖然成日聽人講開奶要較啱份量, 唔好因為怕熱氣而自己調較份量, 咁只會令小朋友更加肚餓, 食嘅時間更密, 但既然仔仔都已經2歲, 而且佢都已經飲得夠密啦, 所以mama都決定試試.....................(bb就真係唔好喇~)

結果係..........好成功呢, 除咗早晚兩餐奶之外, 其餘時間仔仔一扭奶, 我就開枝水多奶少嘅奶奶佢比, 止到佢心癮之餘, 相對地佢飲嘅水份又多咗, 而且由於佢飲奶得密, 所以以往我地食飯時佢都唔多肯食, 寧願餓時再扭奶, 但轉咗e個模式之後, 止到佢扭奶心癮之餘, 水飲多咗而且又唔會太飽肚, 所以...........哈哈~ 仔仔肯食飯呢, 仲試過可以食到一碗仔飯呀(雖然食得慢咗d), 但真係2年以嚟都未試過有成碗飯到肚呀~~

而且便便方面, 可能因為水份多咗, 所以亦都暢順咗好多, 而且仲密咗添呢~~ 哈哈~ 初初mama本住試試嘅心態, 以為最多只係令仔仔覺得d奶無咁好味, 唔再食咁多甚至戒埋奶, 點知而家個結果仲好, 早晚keep住有奶奶, 而日頭就變相多飲咗水份, 仲食到飯飯, mama真係好開心~~ 仔仔繼續加油呀~~

所以今次mama真係要好好記低e個轉捩點~~ 阿mui~~ 真係好多謝你呀, 你嘅提議幫我解決咗蝦仔一個大問題, thank you~~