殺人犯

今次又係講戲

今日去左睇 "殺人犯" ... 識我既朋友都知道我九年都唔會去戲院睇戲的, 連保持愛你我都冇睇你就知我幾唔會入戲院 XDDD

*~~~~*~~~~*~~~~*~~~~*~~~~*~~~~*~~~~*

以下評論有內容未睇套戲又諗住睇既朋友唔好睇~ 睇完套戲先返黎睇啦, 真架~~

*~~~~*~~~~*~~~~*~~~~*~~~~*~~~~*~~~~*

呢套戲吸引我係張 POSTER, 剩係呢個表情我已經知道一定好好戲, 我入場都只係諗住欣賞下佢既演技, 套戲我估係 d 殺人, 然後 d 差佬又點樣破案之類的戲.....

睇完之後覺得好有驚喜, 套戲既舖排非常好, 一路引你諗左果個方向, 到最後先知...好少有估唔到的戲了, 平時睇親戲都會猛諗所有可能性, 咩都諗到咁滯, 但呢套... 真係估佢唔到, 但係佢所有野都 make sense 的. 倪匡講過, 好既故仔係 "意料之外,情理之內", 呢套戲講既野係現實, 係有可能發生的, 呢個世界係真係有呢 d 人架喎, 只係大家都唔會諗到o者....

劇情唔多講, 不過有好多細節位我覺得好讚, 例如... 點解個細路永遠可以係適當既時候篤爆人, 好似話呀鬼偷左張畫呀, 又唔比佢拎張畫, 又係人地搞野既時候扭計要呀媽陪佢訓呀.....又會係呀媽唔想提件事時個細路看似無意地彈幾句野出黎話爸爸成日唔知去左邊.....  (等郭富城懷疑自己) 又會係郭富城想追賊既時候彈一句 "爸爸唔好掉低我啊~~" 呢 d 都係到最尾先會知, "啊... 唔怪得啦~" 咁, 呢 d 咪就係導演編劇既功力囉

散場時我見好多人係度鬧, 又話 side 錢, 又話唔知佢 up 乜....我覺得好多人睇戲都接受唔到特別野, 好似文雀咁都好多人鬧, 其實一套戲可以欣賞的地方有好多, 舖排, 拍攝手法, 畫面感覺, 訊息, 細節伏線...."殺人犯"唔係一定剩係講殺人破案先叫好睇,一套唔係平時睇開果種情節, 咪仲好睇仲特別! 又唔係冇可能發生喎.... 我諗佢地都係去睇大內密探零零狗呢 d 戲算啦, side 哂全劇人員的心血!

一開始已經好震憾既一幕... 或者我睇戲比較投入, 好多人會話假呀, 誇張呀... 但睇戲睇到咁挑骨頭, 都享受唔到睇戲帶比你既樂趣啦~ 睇戲投入先會令你感受到另一個世界, 一個唔屬於自己既世界. 或者可以話有少少過分賣弄血腥既, 但果 d 場面拍得好, 我就覺得好驚嚇喇~

唯一一樣我覺得解釋果段時間好似長左同埋 detail 左, 不過或者係要解釋點解變成咁啦. 同埋佢變聲果度真係嚇死我, 勁似鬼上身, 但果句對白我真係好鐘意.."你地寧願相信鬼..."

同埋雪櫃 (定焗爐?) 果幕比任何一幕血腥場面更震憾同驚嚇!

呢套係一套好片, 我好鐘意,但可能我太投入, 我睇完超驚 (或者係個心唔舒服果種感覺)... 我連廁所都唔係好敢去, 我覺得有少少 law lay jean.... 一.一

XDD