瘋騷快活人 (XX)--完結篇

2008年11月25日 第二十集 (梁繼璋)
     人生裡面，有無數個第一次，亦都有無數既最後一次，其中有幾多次你係會記得既呢？
     我小學畢業前最後一日，大家交換記念冊，過咗呢一日大家就會各散東西，可唔可以再見都唔知道，所以雖然大家年紀仲細，都難免有D D既離愁別緒，我仲記得我喺紀念冊嗰度寫住：希望各位良師益友，賜我金鍚良言，作處世方針！呢句說話其實係我家姐教我寫既。佢話：「得架喇，你咁樣寫就。」實際意思我都唔係太清楚，其他同學寫D乜野，我大部都失記，最諷刺既反而我記得其中既兩句(就係咁)：松樹不因寒而枯，友誼不因別而忘！不應忘記，但係我始終都係忘記咗！
     另外既最後一次，係同女朋友分手，喺最後一夜，我哋大家早講咗當咩事都無發生，好開心咁傾計、飲野、食野、相擁而睡，直至天明。我醒咗之後，唔想面對面講再見，所以換咗衫，諗住就咁就走。但我企喺度望住瞓著覺既佢，望咗好耐‧‧‧好耐‧‧‧直至我發覺自己既眼淚唔知幾時流咗落唻，我知道係時候要離開喇！嗰日之後我哋無再見面，轉眼已經過咗好多年。
     仲有最後一次我同我爸爸見面，係有一晚，護士喺零辰十二點幾叫我哋去醫院，話佢快要走喇！叫我哋去送佢最後一面，我哋全家企喺床邊企咗好耐，爸爸只係沉沉咁樣昏睡過去，突然之間，佢慢慢張開雙眼，我以為佢會起碼望吓我哋先至離開，點知佢雙眼一抬起，唔夠一秒，又再閉上。就咁結束咗佢勞碌既一生！
     無數既最後一次，有D依然叫人個心房隱隱作痛，有D已經化成淡淡既回憶，若有若無既煙霞，只係間中喺腦海中閃過。最後一次，喺做呢個瘋騷快活人，各位聽緊朋友，梁繼璋衷心同你講一句：多謝！有緣再見！

2008年11月25日 第二十集 (李麗蕊)
      當我知道呢一篇係最後一篇為《雙聲道》寫既文章，實在係百般滋味在心頭，坐喺書枱前面苦苦思量、千頭萬緒，難以落墨，都係為咗兩個字--唔捨得(不捨)，唔理大家對於我既文章有d咩評價，生活咗咁多年，總有d說話想同大家交流一吓，我珍視呢一篇每星期一次為自己既週記，記錄人生感受既功課，埋藏喺心頭既千言萬語，遍言隻語又點可以講得清楚呢？
     事情往往就係咁架喇！欣賞花朵開放既嬌美，唔會諗到花落既倜伶；睇表演時只會在意開幕時既期盼，而少有在意落幕時既綢帳；落日出時既朝氣勃勃，又點會諗到日落時既夜色沉沉；望見初生嬰兒既喜悅，懶理白髮瘡瘡既感懷。雖然我哋都瞭解萬事萬物有始必有終，有起便有落，有第一次就有最後一次，但每次到咗時候過得好快，又係時候講拜拜既時候我都會好傷心！
     呢一份爾由未盡既牽絆，特別係你越唔想佢結束既時候，上天就偏偏狠狠咁畫上一個記號。除咗半推半就、默默承受呢一個結局，似乎沒有太多既說話可以講，無任何既事可以做，當舊日美好既事物都陸續消失喺自已既眼前，例如話：碧麗宮無咗喇、利舞台起一個新型既䢛厦、美利樓被斬件燦存、鐘樓都要被更新替換既時候，唔敢講是否一代新人勝舊人，只係感嘆喺時間既洪流當中，無辦法扺擋既係無常既變數，好似凡高畫既畫，都要等待畫家死咗之後先至被珍視起唻！
     好多時，往往要去到失去之後，先至開始變得有價值。我敢講；2008年對於全世界每一個人都係嚴峻既一年，呢一個海潚令到大家蒙受不只係金錢上既損失，有人怎至無咗份工，更加多人失去咗既係一份動力同埋尊嚴，我喺檢討今年既起落，只可以一笑置之。我體驗到既然喺出盡渾身解數既時候都無法逆轉時候，唯有暫時退落唻。即是話；今日退一步，就係日後進一步既本錢，退即是進，與即是得，喺呢幾個月唻，每一晚我都同大家開心過，總算不枉此生！每次收咪之後，我都可以好滿意咁樣一路回味你哋既留言，你哋既鼓勵。一路查車返屋企既時候，係我每星期最期盼最開心既時候，我知道；我會好唔捨得，但係我會記得；你哋既支持同埋你哋既愛護！係最後既一夜，由衷咁樣講聲：多謝晒！