2008年10月29日 第十六集 (梁繼璋)
我係「香港人」，一種由歷史締造，獨特地有香港色彩嘅人。我講普通話非常「普通」；我講英文，啲外國人聽落又覺得我講緊中文；我講中文又加咗好多潮語，好「騎呢」，外省人都「O嘴」。因為我講嘅係「香港話」，係香港人先至識講嘅啫。我住喺香港，所以我有晒香港人嘅特質。嗱我行路好快嘞，雖然唔趕時間；我講嘢好大聲喎，雖然同我講嘢嗰個人唔係聾嘅；我好中意趕潮流，雖然我唔知咩叫做「潮流」。要數香港人嘅好，有好多。包括「打不死」、包括「夠勤力」、包括「有生意頭腦」。要數香港人嘅唔好，可能都有好多，包括「打不死」，即係太固執嘞；包括「太勤力」,即係工作狂嘞；包括「有生意頭腦」，即係太噱頭嘞。所以話凡事有兩面睇，好嘅一面如果你從另一個角度睇，就變成壞嘅一面。畢竟香港人同任何地方嘅人一樣，都有佢可愛嘅一面同唔可愛嘅一面。譬如話，個個揸車嘅朋友都話嘅嘞：香港係一個學車嘅少林寺，如果你喺香港都揸得掂嘅呢，噉你邊度都會揸得掂嘅嘞。因為香港人心急之餘呢，都好好勝嘅噃。就算畀你爬咗一個車位，佢都會覺得蝕咗好多錢畀你嘅。所以每到返工放式時間，你就會見到啲大車，細車，靚車，殘車，一齊喺繁忙嘅地區玩一個「你不動，我不動。你一動，我即動」嘅jam車遊戲。
又譬如呢，香港呢係一個充滿機會嘅地方，呢啲機會包括「你揾你嘅錢」，又包括「你揾埋我嘅錢」。我哋呢度有不少都市陷阱，等一啲無知嘅人上堂。跟住點啊？交學費囉。好似今日我睇新聞，知道有個阿伯因為有個陌生人「卟卟卟」敲門問佢借水飲，佢開門畀佢。畀佢打一身重打埋劫，「借水」變成「度水」。呢個就係香港大大小小嘅陷阱之一嘞。
所以，作為一個香港人，我哋要醒啲，醒啲，再醒啲。因為好嘅香港人有好多，唔好嘅香港人重多啊。
2008年10月29日 第十六集 (李麗蕊)
噖日，我喺一間出名貴嘅supper market度買嘢，全程受到禮待。售貨員有問有答，收銀員亦都訓練有素噉將我賣嘅嘢好有條理咁樣放落環保袋，重不忘會講聲「Have a nice day!」。滿載而歸嘅我正係步出玻璃門嘅時候，非常之有禮貌噉樣講聲「唔該」，希望之前嗰一位攞住名牌手袋嘅靚女會撐住度門畀我行過。被冷眼之餘重係成度門好大力噉樣拍落嚟，真係豈有此理！
行到去lift門嘅時候，睇住有一位賓賓姐姐，佢推住一位坐輪椅嘅婆婆正想入lift。裡面幾個打扮好中產嘅男女無動於衷，任由一個四眼仔猛喺度撳「Door Close」，我一個箭步上前用對腳踢開度門，再用眼神掃過呢一班人。就同剛剛趕到嚟嘅呢一位賓賓姐姐講聲:「Come on in」。輪椅婆婆講聲唔該，但係其中竟然有一個女人話：「乜噉㗎！嚇死人咩！」我應咗佢一句：「乜噉㗎，乜咁冇家教㗎，乜阿媽冇教嘅咩？」呢一位女仕冇聲出，我為自己嘅所作所為感到非常之高興。
以上嘅情況屢見不鮮，香港人成日話自己係禮儀之邦，真係唔知醜啊。用電梯嘅時候永遠都唔識得靠右手邊企，方便其他趕時間嘅人。排隊嘅時候撞到同事，就「借啲依」「打尖」。不論喺乜嘢嘅場合，都會好大聲噉講嘢，高聲喧嘩。重有啊，睇戲嘅時候一定會有電話響嘅，重會肆無忌憚噉樣大大聲聲喺度傾電話、講劇情、食爆穀。我成日呢會喺戲院嗰度同人起衝突嘅，無辦法可以集中睇戲。搞搞下我都費事入場睇，唔想自己唔開心啊嘛。重有啊，好中意嘅就係大聲噉樣傾手提電話嘞，開會嘅時候呢，起碼呢都會被騷擾四次，之後呢又會問「啊，唔好意思啊，頭先講到去邊度啊？」真係火都嚟埋。
一上車，啲人就會中意扮瞓嘞，打機嘞，睇八婆雜誌嘞，噉就唔使讓座畀一啲有需要嘅人囉。過馬路嘅時候走過斑馬線，冇話會停車畀啲行人嘅，綠燈起步嘅時候嘅話，遲一秒就會呠人。若果你要坐一啲短途嘅的士，唔跳錶嘅話就好似做咗佢嘅殺父仇人一樣，總之一定唔會令到你好過。
綜合以上種種，不論你係行人、司機、乘客，無時無刻都會被不禮貌對待，不論喺任何嘅公眾地方，都會被噪音騷擾。曾幾何時我問過一位嚟香港度玩四日嘅外國人對於香港人嘅印象，佢笑笑口噉話：「哈，香港人好中意熱鬧㗎。」衷心希望香港以至我哋嘅中國人，都要喺禮貌同埋公民動教育上面多做一啲功夫。事事予人方便，守秩序一啲。有禮貌係有文化，有教養，有素質嘅民族基本嘅風度。擴大至到去企業，就要有道德，有誠信，有良心，唔單止係要以利益為重。祝愿我嘅嘅祖國每一個人都可以有素養。呢一個係我嘅「One China, One Dream」。
