高雄 + 墾丁大冒險之旅第三天 (Part 3)

四重溪溫泉～出火～屏東牛～墾丁大街～小灣酒吧

四重溪溫泉～旅遊書有介紹《南台灣大飯店》，我上網睇過佢嘅溫泉環境比較好，價錢又唔貴，話有十個池，但其實可以浸到只有兩、三個，水溫唔係太凍就係太熱。環境都係麻麻地，不過算啦，我同大少都好想浸溫泉，起碼可以完成心願先啦。

最神奇係以往浸完溫泉唔覺皮膚有咩唔同，今次浸完美肌池及中藥池，我哋兩個都發現沖涼時皮膚滑咗好多。

出火～欣賞天然氣造成從地上產生火堆，因為條路好黑，我哋一早有準備帶咗電筒，司機都好細心，佢都有電筒提供。

落車時在路邊買咗彩色煙花，我要試吓學人拍攝煙花劃圖，我哋用嘅係傻瓜機，都唔知得唔得ga～

經過我哋多番嘗試，都算成功影到，只不過睇唔到個人樣啫，哈哈．．．

玩完已經好肚餓，要去醫肚。日間我哋經過《台灣牛》好幾次，好似阿蘇介紹過，但司機話《屏東牛》好食啲，咁一於去《屏東牛》啦！

去到先知係全部小菜都係牛，簡直係全牛宴呀！叫咗薑蔥毛肚、滷味（牛筋、牛肚、牛腱）、蔥爆牛肉飯、牛肉麵、炒青菜。唔敢叫湯飲或叫得太多餸，要留番個肚去大街掃街。

叫司機喺墾丁大街街頭放低我哋，第一檔要試係阿蘇介紹過嘅義大利杯麵，大少揀白酒蛤犡麵，睇住佢放咗好多配料落去煮，真係比足心機煮ga，所以要等得幾耐吓。

跟住想買苦瓜汁飲，嚟咗幾日台灣，我都無飲過，今晚係呢個旅程最後一晚，突然好想飲，大少話唔去尋晚嗰檔去第二檔買，點知．．．．．．越行越唔對路，好多檔販都無開，又無理由行返轉頭買，唉．．．尋晚見到好多嘢食，今日就乜都無，連檔新疆串燒都無開。

喺無乜選擇吓，買咗串臭豆腐食，又幾好味喎，老闆娘獨家自創加泡菜嘅泰色臭豆腐，所謂嘅泡菜有啲似醃製過嘅脆瓜，加埋個汁酸酸辣辣咁，好開胃，我唔知佢呢啲係咩泡菜，總之唔係韓國嗰種啦！

老闆娘好好人同我傾計，佢話啲人搵到錢所以今日係星期一唔開檔，仲講笑話自己搵唔到錢所以要開檔。

行到差不多街尾，有另一檔嘅新疆串燒，都照剎，先買一串羊肉試吓，雖然都唔錯，但無尋日果檔咁好味，因為無乜嘢食可再買，唯有買多幾串返酒店食，我哋最麻煩係要一串大辣、一串中辣、一串小辣，可能無客人嘅關係，檔販完全無搞錯比我喎，勁呀！

等佢燒嘅時候，有一家三口似乎係香港人，小朋友話要食，爸爸用唔咸唔淡嘅國語幫佢去買，心諗．．．有人屎過我，哈哈！

返到酒店一開房門，嚇一跳，見到個蛋糕放喺茶几上，真係好surprise又好感動呀，差啲唔記得咗今日係我生日添，我不停問大少係咪佢送，佢話唔係，不過枱面有張complement 印咗經理個名，所以我有理由相信唔係大少嘅安排。

玩完切餅＆食蛋糕，去酒店附近嘅《小灣酒吧》度飲嘢，小灣沙灘係由凱撒大飯店管理，沙灘內嘅《小灣酒吧》亦都係酒店嘅一部份，有live band表演，聽吓歌吹吓海風好舒服啊，真係唔想返香港。

呢張相令我聯想起個廣告“酒精害人，開車前咪飲”

返到酒店，我偷偷地試吓個食剩又凍咗嘅義大利杯麵，咦．．．仲好好味喎，麵質無發漲或變碎，下次去一定要再食。

p.s.睇番阿蘇介紹嘅資料，原來係我記錯咗，佢介紹嘅都係《屏東牛》呀！