BLUE

屯門市中心開左個DISNEY奧運遊樂場，
雖然場地只係好細，但就整得好靚，每一"忽"都落足心機！
其實開左好耐，一直都想同晴晴黎玩，
後日就返工喇，於是今日終於帶左佢去玩~
晴晴玩得超級開心，玩到唔捨得走呀！

晴晴最鍾意係呢個游泳池！

原本真係玩得好開心...
點知丁生打電話黎，知道我去左玩，話我丟低錡錡 (kiki) o係屋企「咁PK」！
又問我有無打俾佢mami...

我又唔係自己走去shopping自己玩... 我帶個女出去玩下都好似做錯事咁...
我夠想兩者兼得啦...
算命師夫話kiki唔出得街... 要10月先得... (o個陣晴晴一滿月我已經帶住佢周圍去....)
如果要晴晴成日o係屋企，佢又悶，佢成屋搞搞震我仲辛苦！

至於奶奶... 我個個星期六日都會搵佢架啦...
打唔打俾奶奶唔洗次次同丁生報告呀嘛....
打俾佢，丁生又唔知...
打少一次/ 打遲一陣就實會俾丁生捉到，又唔高興....
講真，我自己識做o既....
我打，係我出自真心，我亦打得高興！
如果我唔打，你迫我打就大家無癮啦.......

更更更何況，我今日係因為有原因先唔打俾佢...
而丁生竟然用「唔洗咁多藉口」黎形容我....
老實講，呢句說話真係好hurt....

佢走左咁耐，我係比以前主動左好多去聯絡佢家人！
而且我唔係求其敷衍了事，而係真係出自內心o既閞心，
其實佢個人都唔o係香港，我做唔做佢都唔知啦，我為咩要搞咁多野？
最慘係付出左，換黎o既係埋怨、責備、冷言冷語...

而且我星期一都返工啦，唔通我想自己安排下僅餘兩日o既節目都唔o岩？
無錯我係同佢講我今晚想叫佢mami過黎...
但今日我見到我大哥就雞啄唔斷.... 講真我見哥哥仲少過見奶奶...
時間搞晏左，咪諗住今晚求其食就算...
諗諗下遲d返工，就無時間帶晴晴去游水，於是又想同晴晴落去游水...
而且tina成日問我幾時帶晴晴同朗朗一齊游水，一直都未游...

所有野都係同丁生講完之後先諗到o既.... 即興....
所以最終無打俾奶奶叫佢過黎....
點知丁生又話我講左唔算數.........

丁生，如果要算「講左唔算數」呢樣野，你應該比我多N倍lor...
你同我計？

老實講，我同佢家人相處有幾好，佢見唔到，佢唔知，唔知又當唔好.....
我真係俾佢激死....

次次都係咁，
我次次去親街去親玩，總之開心o既時候佢就會搵d野黎搞到我唔開心.....
都唔知係咪唔抵得我去玩........

仲要好多次都係為左佢家人.....
老實講，我同佢家人相處真係ok的，
如果佢再係咁做埋d無聊野，為左佢地而怪我，我諗只會有反效果lor....

佢一方面要我對佢家人好，另一方面就話我D家人點點點...
佢覺得佢D家人係世界上最好... 唔通我家人就係最差？
講真，我家人點樣我都控制唔到，其實我已經好努力去改變...
我有幾努力，丁生知唔知？
我夾o係中間、聽丁生不停o既埋怨....
丁生有無諗過我感受？我有幾辛苦幾無奈佢又明唔明？

~~~~~~~~~~~~~~~~~~~~~~~~~~~~~~~~

尋晚加拿大o既大姨婆過左身...
原本仲想遲d過去探佢...
今日即刻去左探婆婆...
老人家，真係一日算一日.... 探得一次算一次....

尋日同婆婆去青山覆診，
特登提早去覆診，其實係為左想求個醫生開証明幫婆婆可以快d入政府老人院...
(之前排左8年，配左去少田... 於是要再排過...於是個社工教我地去搵醫生)
平時覆診見個靚女醫生超級好人，希望佢會幫我地...
點知... 唉... 佢面色都變埋...... 話唔可以亂咁寫...
我都預左... 亦明白佢立場...
我地係有我地需要，但其實係人都想快，唔通佢又個個都幫咩.....
無辦法啦... 我盡左人事..... 試過都好過無試！

婆婆o個度開支大丁生又唔明... 媽媽壓力有幾大佢又唔知....
唉...傻.... 我o既壓力丁生都唔知啦...更何況係媽媽......

唉... 我都唔明...
點解所有野都咁唔順心...
所有野都好似同我作對咁...
我得一個人一個心一對手... 我究竟做得幾多？