錯調BB

伊院發生錯調2個女嬰之事故, 晚上, 寶寶爹跟我探討這個城中熱話。

寶寶爹: 政府醫院真係信唔過, 好彩嗰陣我堅持要你去私家醫院生咋
我: 私家醫院咪一樣差啲調轉
寶寶爹: 邊會?!
我: 你唔記得喇? 寶寶出院嗰日呀, 你攞晒啲出院文件去交錢, 我去攞衫仔俾姑娘同寶寶換, 跟住你俾張"贖仔紙" (醫院收據) 我去贖仔, 我等等吓, 望吓張贖仔紙, 發現亞媽個名唔係我呀! 跟住我話俾你知, 你先去會計部係咁鬧人, 搞到個院長要出嚟同你道歉, 你唔記得咩?
寶寶爹: hey, 咁都冇調轉吖
我: 人哋叫你俾幾多錢就俾幾多錢, 俾完都唔對吓啲資料啱唔啱, 如果唔係我望吓張贖仔紙, 都唔知抱咗邊個bb出嚟俾我o添呀 !! 又好彩醫生攞完亞仔出嚟, 我第一時間記住亞仔個樣, 又一日去餵幾次奶去check住亞仔個樣, 如果好似你咁懵吓懵吓咁就死火喇~
寶寶爹: 我都認得亞仔個樣, 我邊度懵?
我 (指著寶寶爹的頭): 你呢度懵囉, 仲問 !!