白頭爸爸，生日快樂！

5月2日，香港傳遞聖火嘅日子，雖然我見唔到長雲火炬，但係俾我影到長雲啊！

今日，亦係我哋補祝白頭爸爸生日食飯嘅日子，一家四口去咗客家好棧開飯呢！

白頭爸爸正日生日係4月30號，不過我要番P，於是就將飯局退到今日。

首先，我哋點咗呢個濃燉湯，有蘋果、雞、豬骨等，都幾足料；個湯好潤，唔太油，好味。

食湯渣時：

實在太肚餓喇！

跟住係魚湯浸勝瓜，裡面有蝦、帶子、花枝片，全部都好新鮮，尤其啲蝦，勁鮮甜！

呢個係螺片煎釀荳腐，稍嫌荳腐唔夠滑同唔夠入味。

呢味客家風味魚炒得好入味，除咗魚柳，佢仲加咗甜梅菜、秀珍菇去炒，菇菇 is my favourite！

仲有分開咗上嘅酥皮原味雞，本來應該個酥皮要笠住隻雞o架！而家破壞咗個賣相。

不過隻雞真係好食，全體讚好；又稔又入味，仲有少少酒香！個酥皮都好正，甜甜的，好明顯係搽咗層麥牙糖再去焗，食到我停唔到口呀！

白頭爸爸仲每人俾咗隻雞脾我同momomama，多謝你啊！

叫咗好耐嘅白飯終於到喇！momomama好無聊咁整咗個笑臉。希望大家都開開心心！

我哋仲有食甜品o架！不過掛住食，唔記得影。叫咗楊枝甘露同埋唔知乜嘢芒果糕，兩個甜品四個人分，你一啖，我一啖，兩個甜品就不停咁傳嚟傳去，好搞笑；不過唔緊要啦！一家人嘛！

埋單都唔駛四舊，又平又好味，不過服務差啲，乜都要題幾次先做到。

在此再祝白頭爸爸生日快樂，身體健康同埋賺多啲！