華東遊記

9月24號-28號一連5日同阿媽去左華東旅遊, 對上一次同阿媽去旅行已經係4年前去北京喇! 由於同阿媽去既關係, 所以選擇跟團! 今次係跟康泰, 整體黎講尚算OK, 豪華團團費只係$1799, 搭港龍機, 4晚都係住5星酒店!

總括黎講整個行程都好好彩! 首先出發前一日, 颱風黑格比襲港, 掛8號風球, 開頭擔心會去唔成旅行, 幸好天文台夜晚宣布會係24號朝早6點改掛3號, 而我地班機原定8點起飛, 領隊check過航空公司應該只係delay 30分鐘, 於是照舊朝早5點半機場集合.

但因為要凌晨4點出門口, 當時仍然掛緊8號風球, 所以橫風橫雨底下都有D狼狽, 搭的士出去巴士站又要額外加多$30, 出到去巴士站又唔知有冇機場巴士, 等左一陣唔對路, 好彩係巴士站遇到其他要去機場返工既人又係響度嘗試等機場巴士, 後來一齊搭的士去機場, 我同阿媽兩個只係$100! 總算係出門遇貴人, 貴人出門招風雨喇!

後來個導遊話番比我地知, 有另外一團康泰華東團係同一日出發, 搭早上11點中國東方航空機, 但竟然因為颱風關係, 要delay到夜晚11點!!! 又一再令我深信一分錢一分貨呢個道理!

另外當我地第一日抵達杭州之後, 每當我地要落車遊覽時, 總係陽光普照, 但當我地上左車/ 船之後就落雨!  之後咁多日都冇落過雨, 我地帶去既遮只係用黎遮太陽多D! 跟住返黎香港之後, 颱風薔薇先至吹去浙江上海一帶!

至於住宿方面, 雖然4晚都係住5酒店, 但我覺得第二晚係無錫果間酒店(唔記得叫咩名)就唔多似5, 不過都乾淨企理! 最好就係第一晚係杭州既Sofitel世外桃源酒店同最後一晚係上海既Sky Fortune酒店! 特別上海既Sky Fortune酒店, 每間房都分有客廳同睡房, 電動窗簾, 走廊燈同浴室燈係紅外線感應, 連D杯都有好靚既英式印花! 另外服務員質素都好好, 懂廣東話及英語!

食物方面就只屬一般, 始終係跟團關係, 離不開8餸1湯, 最慘係每餐都係菜多肉少, 8碟餸得到一碟係肉, 而菜就餐餐都係果D菜: 醬油炒茄子, 紅燒麵筋, 生生地既炒椰菜, 炒蒜芯....雖然味道不太差, 但餐餐係呢D都食到驚! 所以有其中一餐隔離檯團友忍唔住要自費加魚同雞! 比較好D係上海果餐, 有魚, 雞, 小籠包, 大城市真係唔同D! 可能我地食左咁多日齋, 當我地見D餸一出, 幾個團友不禁大叫: 「肉呀! 」

玩樂方面, 始終華東係以觀景為主, 所以冇期望會好好玩! 不過因為我鍾意乜都影一餐, 去一D自己未去過既地方影相可算係賞心樂事! 至於上海就冇乜特別喇, 因為我之前已經去過2次, 冇乜驚喜!

以下係今次旅行影既相, 有興趣可以睇下, 某D相加左註腳講解:

Day 1 - http://www.new.facebook.com/album.php?aid=56790&l=ba2f4&id=618523271

Day 2 - http://www.new.facebook.com/album.php?aid=56797&l=a579e&id=618523271

Day 3 - http://www.new.facebook.com/album.php?aid=56806&l=55798&id=618523271

Day 4 - http://www.new.facebook.com/album.php?aid=56812&l=d3cc5&id=618523271

Day 5 - http://www.new.facebook.com/album.php?aid=56819&l=4bf48&id=618523271