激光脫毛 ~ 請小心選擇

其實已經想寫好耐, 一來懶, 二來近排都無乜心機寫blog, 一直拖到而家. 希望呢篇文章對想做激光脫毛既朋友, 有少少提醒啦!

入正題:

我上年十月左右, 的起心肝, 想整走d 手毛腳毛. 激光就一定係最好選擇啦! 睇過價錢同上網睇過討論區, d 字頭嗰間整全手既話要19xxx, 美容師做, 又發現一間叫星x 既, 全手只係五千幾, 有8次, 仲寫明係醫生主理既. 價錢差咁遠, 仲要係醫生做既, 應該係放心好多啦, 醫生喎, 專業架嘛! 而且真係平咁多, 做手同腳加起都平過d 字頭呢間既手啦!

係討論區又見到好多人話星x 好好架, 醫生又好好人架! 寫佢做介紹人仲可以平二百蚊喎!

咁我就頗放心咁 join 咗星x 做激光脫毛啦!

第一次上去, 要買麻醉膏搽, 搽咗要等一個鐘. 見到醫生時, 佢真係好好人喎! 笑笑口, 細細聲咁講野.

佢同我講, 手毛同小腿毛既粗幼唔同, 生長期都唔同, 可能做多幾次後, 約期會唔同, 要視乎d 毛既生長速度.

而且d 毛大約兩個月至三個至生長一週期, 要兩月至兩個幾月至做一次. 每次可以減少20% 左右. (照咁計, 8次之內一定可以無晒毛毛啦, 就算有都係好少啫)

(麻醉藥同之後既消炎藥係要另外買架.)

佢會做兩部機, 第一部激光做得都幾快, 唔痛. 但即時就唔係好多毛甩咗, 佢話過幾日會甩架.

跟住做第二部機, 呢部頗痛, 係另外一位同我做既, 唔知係唔係醫生啦, 總之門口掛既醫生牌, 就只有做第一部機嗰個醫生既外啫.

第二部機係將d 毛整白咗, 我做係為咗d 毛甩之前起碼睇唔出有咁多毛掛.

做完後都幾滿意, 因為d 毛毛變白咗, 唔覺眼, 咁就同做之前分別幾大.

咁我做完後, 佢就同約咗下一次既日子. 叫我係屋企出門口前搽定麻醉藥, 咁去到就可以即刻做, 唔使去到至搽, 要等藥力生效.

..........................................................................................................................................

所有問題, 就係第二次開始. 之前甩咗既毛毛, 大多數都出返晒, 我諗有9成. 有d 係生緊, 未出晒, 未知會生返幾長. 生返出來係黑色. 個心都開始有d 膽心, 但諗起醫生話每次減20% 左右, 我只係第一次啫, 唔使驚既.

到咗第二次上去, 一入去, 登記既職員就問我搽咗藥膏未, 夠唔夠一個鐘. 我話夠, 一個鐘前搽既. 同一時間都有幾個人係到等緊, 我諗佢地可能係上到來至搽藥膏, 要等啦.

點知, 等等下我都覺得唔對路, 叫咗三四個人啦, 都未到我, 我已經等咗大半個鐘啦! 我就問登記嗰個, 係唔係漏咗我呀?

佢話下個到你啦!

我終於要等咗成個鐘, 至到我. 我心諗, 麻醉藥仲有冇效架, 兩個鐘前搽架啦!

我唔係個好出聲既人, 見醫生同我笑下, 我就算啦! 第一部都係唔多痛.

做完第一部機, 好快啫, 都唔使十分鐘, 跟住就出來排第二部機啦. 又要等, 又等咗半個鐘.

今次真係幾痛, 仲要出晒血點, 我除咗眼罩後都嚇親. 但佢地話過兩日會散架, 跟住d 皮膚都會白d .

好彩仲係冬天, 著長袖, 為咗靚, 忍下啦!

..........................................................................................................................................

第三次, 第四次, 第五次.....

每次上到去都要等成個鐘至做第一部機, 跟住仲要再等做第二部機. 次次由上去到走得, 必定超過兩個半鐘.

咁使乜約時間啫, 先到先等仲好啦! 返正都唔係跟返時間做.

時間問題我都唔太介意啦, 我都習慣啦, 預足三個鐘比佢, 但人地要返工既話, 一心請兩個鐘假既, 真係比佢玩死囉. 我見過有人等咗個幾鐘都未到佢, 就發火啦, 佢係請兩個鐘加上食飯時間去既, 等到都夠晒鐘要返工啦.

...............................................................................................................................................

約期方面:

佢最初話要睇d 毛毛生長速度約期, 但到而家為止, 佢都係同我約同一日做晒, 仲要約6-7星期後, 即係未夠兩個月啦, 咁有d 毛毛未出來既, 電乜鬼啫. 可能佢想少d 毛出來時, 快手d 做晒啦, 佢book 得咁滿.

其實每個客人要做邊 part, 佢地係知架, 跟本可以預計到要做幾耐, 約到咁滿, 跟本就做唔來.

我試過有一次, 已經等咗個幾鐘, 到我時, 因為要帶眼罩, 佢靜靜雞換咗第二部機嗰個來同我做第一部機, 帶眼罩前仲係嗰個醫生架.

咁個醫生就偷到時間食d 野啦.

佢地仲會係有人取消booking 時, 打來問下, 嗰個時間有位, 可唔可以去做. 即係要提前啦, 咁唔使等d 毛毛出來架?

完全只係就佢地既時間.

...............................................................................................................................................

個醫生做既態度:

可能係排得太滿既關係, 個個都等好耐, 有部份人入到去都口黑面黑啦! 咁佢又要趕下一個, 個既時候真係好求其.

激光應該係一下一下咁打落去既. 電視上面都見過. 但呢個醫生一趕起上來, 係用掃既方式, 即係一行一行咁掃, 每下激光係有一聲架, 係兩下激光之間, 佢有時手快既話, 係掃咗好遠架啦, 咁即係中間有好多位係打唔到激光架. 咁做好唔專業啫.

最初因為我信佢, 佢點做我都無理, 但到5次之後, 我發覺好多毛毛會生返出來之餘, 有d 位係由頭到尾未甩過既. 好似手指位咁, 佢只係打一下, 邊邊位又會漏咗無打到, 咁d 毛點會甩呢.

我諗就算去美容院做, d 美容師都會認真過佢囉.

總之而家就覺得煩啦, 都唔多想再去做, 但又比晒錢囉. 早知就去其他美容院啦, 都唔使一定搵醫生做, 效果咁差.

...............................................................................................................................................

網上討論區既好評:

討論區真係見到好多人話呢間野有幾好幾好, 做咗好掂.

我唔知佢地係唔係真心咁講, 只見d 人話寫咗佢做介紹人可以平二百蚊之類.

係既, 真係平二百. 但唔多覺有人寫話, 佢介紹咗人地 join 咗, 佢可以免費做一次架.

因為有利益關係掛, 一定寫好d 啦, 到時唔好既, 關佢乜事, 又唔識佢既!

...............................................................................................................................................

總之, 而家比我揀既話, 我一定唔會幫親呢間囉!