SPA之二三事

5號嗰日同另外8位親戚一齊去SPA，過夜直到6號嘅下午先走，但喺呢24小時内就發生咗三件唔太開心嘅事件，其中兩件當中嘅主角都係有我。

咁啱三件事都係6號發生，當日我地食完早餐之後就打pair，因爲唔係賭錢，所以輸咗嘅洗牌，大家都知玩遊戲就係咁，講就話有輸有贏，但其實一輸開就有條路。當日賤男嘅阿媽都有同我地一齊去玩，我地叫佢芳姨，芳姨係好勝嘅人，佢咁啱手氣唔好，輸咗好多次，洗咗好多次牌，但其餘嘅親戚就好中意佢派牌，大讚佢派D牌靚，原本呢D説話講頭幾次，芳姨重可以接受，當開玩笑，重大聲話：閘住！

但呢D玩笑長期開就變得唔好笑，同時重會令人生厭，芳姨突然大發雷霆：嗱！唔好再講喇！！以前試過有個男人同我一齊打麻雀，佢嘈住晒，於是我兜巴打埋去，叫佢行開，唔同佢玩！！~大家一聽完呢句話都知道芳姨真係嬲。

唔夠十五分鐘，我個EQ低過恒生指數嘅表姨突然因爲芳姨一句説話而被辣著咗，立即就駁嘴頂撞長輩，然後重趁芳姨去廁所，另外幾位親戚就高談闊論，而我當然就唔參與討論，齋聽啦，因爲我從頭到尾都冇同芳姨開過玩笑，基於我又同佢曾經有D尷尬事發生，所以我就算幾唔中意佢都唔表現畀佢知。

第二件就係食中午飯（自助餐）嘅時候喇，呢次主角終于係我，我要多謝我表姨畀個機會我出場，皆因佢去攞湯嘅時候，佢同佢姨媽去，佢姨媽攞咗四碗，然後行先，佢再攞兩碗，咁啱我就行過，佢後面就有個男人就話佢：嘩！攞咁多架！

我表姨立即用對死魚眼掘住人，然後就話：關你乜事？我見到冇理由唔出口相救，只好同人地講唔好意思，表示同行人多，並幫對方裝湯表示歉意，但我呢番舉動卻得唔到表姨嘅認同，佢返到座位都依然磬過火屎，講足半個鐘。

第三件就係午飯已經食到近尾段，我丈公突然對我講：下次你就帶爸爸媽媽過嚟玩喇！咁我就好自然如實答佢：媽咪有高血壓唔可以浸溫泉同桑拿，如果為咗食野就周圍都有自助餐，唔使一定入嚟呢度！

點知話音剛落，丈公就話我：你咁嘅孝心就唔得喇！！

我立即唔出聲，我依稀記得佢後面重接有説話，但我已經冇心機聽落去！我唔係唔肯帶父母出去玩，只係要玩都要考慮到身體及能力，為咗一時快樂而傷身兼令家人擔心，又有乜謂呢？而且，有冇孝心首要一定係為父母嘅健康著想，而唔係令佢地得到短暫快樂但失去長期健康。

更何況我嘅孝心，除我家人並唔需要任何人評定，孝心唔係做show咁做就得嘅，好似我表姨咁，一大棚親戚去佢屋企食飯就話主動幫手洗碗，然後個個讚佢乖，但得返自己同父母就永遠留返畀阿媽執，自己就成座山咁坐喺度，連地都懶得拖，呢D就係“乖”嘅背後真正面目。所以各位男士想睇一個女仔係咪真係幫得手，同有孝心，真係需要長期觀察，因爲總係有人可以掩飾得相當好嘅！

做完通波仔，丈公依然係感受唔到健康帶來嘅可貴，依然係選擇揮霍自己嘅健康，睇嚟呢次手術並冇為佢對健康嘅睇法有任何得著，可悲！

                               THE END