2005群馬・栃木・長野 - 第二天

池袋→上野→軽井沢→碓氷峠→妙義山→榛名山麓→榛名湖→榛名山→伊香保温泉→渋川市

今日o既行程簡直係緊密過鴨仔團，一早七點就要起程(晨早搭山手線係好少人o架)。因為訂o左新幹線飛去軽井沢，所以去上野搏一搏睇o下有冇櫻花。未去之前睇o左Yahoo都知道未開，好彩上野恩賜公園門口有幾棵已經開o左。雞噤腳影完相就搭新幹線，由上野至軽井沢只需一個鐘(あさま553号)。

九點左近就到軽井沢，一落車凍到結冰，完全係入o左雪櫃feel。第一時間去日産レンタカー(Rent-a-car)租車，要忍受o係隔離o既軽井沢プリンス・ショッピングプラザ(Prince Shopping Plaza)o既誘惑，同行〝團友〞深深體會到過門而不入o既折磨。好彩真係租到我o地想要o既Cube，搞o左一輪識用個car-navi就出發。(Note:o係日本一定要識用car navigation，唔係絕對冇可能識路同埋搵地方。)若果有睇頭文字D就一定聽過「碓氷峠」，依條山路就係今日第一站。

碓氷峠出名之處就係連續不斷密密麻麻總數達183個o既急彎，若果唔鐘意揸車絕對會比死更難受。朝聖C=121同眼鏡橋(碓氷第三橋梁、1892年建成，信越線横川〜軽井沢廃線の鉄道)之後，大約15分鐘就行完。漫畫始終係漫畫，現實又邊有可能揸得o甘快吖？全程都係揸倒40-60km/h，o的彎一個接一個，得o個少少直路。

繼續沿國道18号行，就會經過「おぎのやドライブイン横川本店」(美食Note: おぎのや-１８８５年創業，其『峠の釜めし』是信越本線横川駅之全国有名駅弁。１８９３年横川至軽井沢鐵路開通之後，此轉車處之乘客經常買此駅弁。自從長野新幹線通車、軽井沢間廃線後，此用益子焼之土釜『峠の釜めし』(其實類似褒仔飯)依然極具人氣。)此店對面就係大名鼎鼎o既廣告牌&停車場，食完飯就繼續上路。

下一站妙義山(日本三大奇勝の一)，由「おぎのや」大約10分鐘就到山腳o既停車場。沿路上山都唔算難行，只係比較斜。到達山頂就會見到妙義山o既奇形怪狀岩石，同埋中之嶽神社；山頂停車場向南面仲可以遠眺連綿不絕o既山群。因為山頂實再太凍同大風，所以雞o甘腳走人。落山返到去會經過道の駅，依度有各式各樣o既新鮮農產品售賣。由於全部產地直送，所以價錢非常平。小休之後就向榛名山麓進發。

首先去榛名梅林，依度一共有12萬棵白色o既梅花樹，同紀州和歌山梅の里齊名。當時係初春，望埋去真係成個山頭都長滿白色一片，不過近睇時o的梅花其實都係淺粉紅色。繼續上路，向大名鼎鼎o既榛名山同榛名湖邁進。

榛名山無疑係頭文字D文化發源地，動漫畫更經常取景於榛名湖。由南面上山，越上就越凍，差不多到榛名湖時見到馬路兩旁居然有雪！當見到榛名湖時簡直超級驚喜，明明春天啦但係湖面竟然仲結冰 (上次冬天去北海道時都冇見過)！即刻落車狂影相啦，加上又有藍天白雲，即時凍凍都唔怕。o係山邊仲有厚厚o既雪可以跩，順便懷念一下，絕對北海道feel！原本行程計劃搭榛名山ロープウェイ(ropeway)上山頂，不過見o甘凍都係放棄。

由榛名湖向伊香保温泉落山一段，就係無人不識o既榛名山路。起點由供水塔大直路開始，一直至伊香保温泉全程12km。依段路打機就玩得多，揸真車o既機會絕冇僅有。最大發現係榛名山名物─五連U形彎o既路面已經被改成波浪形，以後o的人想快都冇得快。話o甘快10分鐘唔駛就到達伊香保温泉。雖然有晒地圖+car-navi，但係温泉街有太多旅館，幾經辛苦先搵到今晚住宿o既「伊香保ホテル松屋」。

一早都知道伊香保唔似得東京，但估唔到當地人o的口音真係o甘難明，溝通o左好耐先搞得掂。雖然揸o左大半日車，但係check-in完都冇時間休息。四點幾趁未天黑就去行溫泉街。具有400年歷史o既伊香保温泉，主要集中o係「石段街」。(又係頭文字D時常取景地，連以頭文字D做包裝o既朱古力／餅乾手信都有得賣！) 石段街全長360級，兩旁全部都係旅館、飲食店、土産物屋。伊香保温泉o既泉源就由最上面一路流，提供泉水比全區約60間旅館。

由最低向上行，沿途會見到一o的湧泉口，可以隔住玻璃睇見到流〝泉〞水潺潺。好可惜o的食店晨o甘早就閂晒，只可以買紀念品。伊香保最出名o既係『湯の花まんじゅう』(温泉饅頭)，大部份都係紅豆味餡。不過今次居然見到栗子餡同味僧餡，所以即刻買o黎試試。上到最高就會見到伊香保神社，再行大約10分鐘左右到達「河鹿橋」&「飲泉所」。飲泉所供應免費溫泉水同山水，其溫泉水帶有勁重硫磺味；而山水則如同礦泉水。見到當地o的公公婆婆拉埋車仔一桶桶o甘載返屋企，可以想像o的水幾o甘有益。行到依度都差唔多行晒伊香保温泉，為o左醫肚所以要去渋川駅。

以為渋川駅附近應該多o的o野食，點知又係死城一個！冇法啦只好求其食o的日本o野就返旅館。好在有車，想去邊停邊都得。回程時經過超級市場，見到有靜岡士多啤梨當然唔放過。今晚素泊但有貸切展望風呂(2100日圓)，浸完溫泉抖足精神準備第三日旅程。