2005群馬・栃木・長野 - 第七天

草津温泉→長野→東京駅→成田国際空港→香港

終於到o左行程最後一天，其實全日都係搭車搭飛機。但係多得噙晚場雪，一起身就見出面白濛濛一片。出面全部地方都滿晒雪，仲要係幾吋厚未俾人踩過o既。連架車都堆積o左一層，即刻剷乾淨架車揸去湯畑。

第一次o係雪上揸車，感覺好得意(其實好危險)，好在架車裝o左雪胎、唔係一定跣死。當時七點幾o甘早所以無乜人，只見o的舖頭蒸緊溫泉饅頭。o係湯畑行左一個圈就返去食早餐。

因為要預計三小時車程返長野還車，九點就要離開。o係雪中o既草津的確有另一番風味，一場大雪令到四周灰白色一片，幅幅都係 poster shot。

離開草津亦代表今次旅程o既終結，返到長野之後都係搭新幹線去東京，再轉NEX去成田空港搭飛機回港。

2005 群馬・栃木・長野

──完──