未出發 先Shopping

九男女, Ellen, 教主, Fanny, Paul少, Steven, Ada, June, Mickey同我, 昨晚相約開始玩露營。我地當然唔係夜媽媽去露營啦！

其實露營最好玩之處係佢唔止係玩露營果幾日，可能玩果幾日係最辛苦添，要咩住d野上上落落又要訓地下，但係在籌備露營，討論去邊呀，有咩人去呀，到事後回味再分享咁，都可以攪好耐同好好玩。尤其係對於未試過的朋友，更係緊張同開心，始終咁大個人，好少話去訓街嘛！

經過兩個星期的思考，初一露營大隊經已成型，昨夜我地就去進行露營部分的第一個高潮—購物。

圖﹕一行九男女前後行左三間shop，最後到達麻雀雖少，五臟俱全的「英昌」，我地入到去都霸哂成間舖咯！（Photo by Ellen)

豐儉由人 由淺入深

露營野，平有平玩，貴有貴玩，精粹係愈輕愈好，但就愈輕愈貴。因為露營點都涉及少少遠足，要咩住咁多野行，件件都話帶，樣樣都重的話，真係未到營地已想放棄，所以器材的秘訣係貴輕不貴多。而呢d野同時裝一樣，一件佐丹奴T shirt又係咁著，Gucci衫又係咁著，大家明啦！

但係對於大部份第一次玩的朋友，我都會幫大家搵d平d的用品，但又仲有少少resell value的，咁起碼第一次玩唔駛用咁多錢之餘，若果真係玩一次，又可以收番少少成本丫。

至於大家買左d咩我就唔講喇，大家係度報告下買左d咩同有咩心情啦！不過可以透露下，Ellen買左史上最強雙層鈦隔熱碗，但點都唔肯係打邊爐時拿出來試下；史提芬買左個靚睡袋俾ada，paul少就同Fanny置左第一個家，但聽聞fanny想將d野全部放係Paul少家喎；June呢，就背囊，地蓆，睡袋連相機（豐澤）都有，佢真係大出血咯！

圖﹕價值HK$400的Coleman焗爐，最初攞黎睇下，之後攞上手玩下, 最後差唔多買架喇, 教主話, 三日兩夜, 焗幾個蛋糕出黎, 實有人買呀！最後都係Ellen話去多次先再算啦而作罷。我睇呢件野都好快收歸教主門下…

事後討論

買左大堆用品，大家都係駛左一千幾百，梗係要再進一步討論下行程，實行「未出發 先興奮」。我地去左佐敦炮台街18號的男爵大排檔打邊爐，d牛肉幾好，埋單又酒又汽水都係135一位，我個人覺得ok啦！不過佢地逢星期一休息，臨走時老闆娘見到fanny的新營，話佢好恨有得去，因為佢小時候媽咪唔俾佢去露營喎…

所以大家，要趁有機會玩得就玩喇！

圖﹕教主示範打墨魚滑，Steven即覺無眼睇

P.S. Steven今早來電好消息，他已班到一個保溫袋及雪種，大家唔駛捱罐頭咯！