自信 自負 自私 自己攞黎衰

圖﹕「你」成為Time Magazine 2006風雲人物，正好告訴我，自己是很重要，但也提醒自己，別人也很重要，希望個個人都識咁諗。

有自信係好事, 有信心未必會成功, 但冇信心也未必會輸, 但同樣贏左都係僥倖。

過於自信就係自負, 好黑人憎, 目空一切, 這些人就係以為自己叻哂, 覺得人地個個都要俾面佢, 但事實上, 收皮啦, 連「天外有天」都未瞭解到就扮哂高處不勝寒，呢類人應該早d凍死。

自負之人，好少朋友，久而久之就變左成日自己一個人，結果係事事以自己為中心。佢地係好可憐的，因為平時冇朋友，所以習慣左一個，咁梗係唔識同人相處啦。對於自私之人，熟的我會可憐佢，唔熟的？都唔熟囉，仲要自私添，由鬼得佢囉！

人愈大，就會遇到不同的人。以前對好多人都會有要求，久而久之，便會覺得人生真的如夢，與其把期望放在別人身上，倒不如加注係自己度，自私一下，有咩所謂。正所謂「河水不犯井水」「你對我好，我對你好」。有d人我甚至乎係本住「貨銀兩訖，童叟無欺」的態度，因為被人利用過不計其數。真係當朋友幫下你，我唔會渴望在朋友身上有回報，但若果你利用完我之後仲當奉旨的話，sorry, 我係個斤斤計較的人，起碼係交朋結友上面，我仲會有Taste。

咁唔代表我凡事算盡，我會將我所愛的分享，將快樂帶俾人，但偏偏有d人卻只會係我面前自吹自擂後漠視一切，若果你真係咁叻，又駛鬼係我面前發洩咩？！

其實每段友誼都會經歷過不同的轉變，大部分上我讚得為朋友的，都是我愛的人。以前我凡識的人都稱為朋友，覺得只係一個稱呼，但一次偶然機會下，mickey告訴我，原來她對「朋友」這兩個字都有很深的定義，這才使我猛然覺得，不因該對不起「朋友」這兩個字。

好彩，我身邊仲有好多「朋友」，有d會教我很多，有d會同我分享好多，係度，我要多謝你地，同埋話俾你地知，我都好希望成為你的「朋友」。

以上己見，只是被一個局界於自己世界，自命不凡但又以為不認同當下就是高尚的人激發而起，請勿自行對號入座，但若本文能讓你反思，實也無妨。