PEARL-PEARL LAND

走進PEARL-PEARL LAND, 齊分享我的內心世界~

hi.....

留言

我在E5-21的日子 (I)

網誌分類：自"賢"自語 |

網誌日期：2009-06-11 16:50

係5月尾的時候,係我咁大個女第一次住醫院(當然唔計出世個陣時啦),由於血壓高既關係,睇左醫生食埋降血壓葯都冇用,醫生寫信建議我去睇急症.就係5月21日當晚,拎住醫生信去登記,到左分流站一量就180幾,評估為緊急

,唔比我四圍行,要我坐輪椅推入14號床等候醫生,當其時你坐係出面等候,我個心好驚,因為18號床的女病人,情緒不穏大叫,有好多醫護人員去協助,由於兩邊被白布遮住,只聽到聲攪到我好緊張,靜悄悄打電話比你入黎陪我,個一刻真係好得人驚......

終於等到醫生黎啦,又驗血糖,心電圖,照肺,驗小便,抽血......最終醫生要我留院.醫護員又用輪椅推我穿穿插插咁去到E5女內科的病房,21號床係靠單邊有窗,全個病房最精靈都係我,因為大多都係婆婆.換過醫院既綠格仔衫後,你幫我買些日用品就離開.唉...當時先得9:30左右,悶死人又瞓唔著,時間過得好慢,隔離床既婆婆好鍾意唱歌,佢成晚唱我成晚瞓唔著,半夜時個頭好痛,而且心跳加速,第一次按掣叫護士,佢黎到又幫我攪一輪,.叫埋當值醫生黎睇我,跟著我個身又多左一部心電圖機跟隨住我.
好不容易終於捱到天光,重早過平日起身返工,7:00未夠起身梳洗,8:00食淡而冇病既早餐,量血壓,抽血9:00醫生開始巡房,佢左問又問,又係我個身左按又按,又話我個腎功能好差,之後輪到一個醫生又係我個身左按又按,我真係好擔心呀!!突然收到一個惡號,佢地要求我留24小時的小便,重要2大樽,又話幫我安排照心臟超聲波,計一計最快先24-5-09(星期日)先出得院

,當佢地離開後,我個心好不安,唔知情況係咪好嚴重,又唔知幾時出到院WOR,不禁喊起來

我自己知道自己事,一喊自己個心情好難平伏,不斷地安慰自己今次入院當身體檢查.
         大約11:30左右又食午餐,同樣地淡戌戌,但求熟冇味,一個唔識煮既人都識得整咁,食過飯後冇耐要吊鹽水,我都唔敢望,真係痛過打針同抽血,真係救命.....打完隻手有野"銀"住好唔慣呀!!由於H1N1的關係,探病時間只得晚上6:00-8:00,只限2人員!
         真係好期待.....終於都到6:00你,亞BE同亞賢都有黎探我,但有你地既兩小時真係過得特別快......你地走左冇耐,我整個人都好累,9:00幾就瞓到大天光.

引用(0)

知多一點：

共2個回應

檢舉
章可Be 2009-06-13 19:40

真係要小心身體, 我唔鍾意咁樣係醫院探妳囉!!

希望下一次係新生命既誕生~

檢舉
Pearl@man2009-06-14 11:13

當然我都希望你下次探我係新生命的來臨.....但我擔心以依家的身體狀況,都唔知係幾時既事.....
檢舉
Kennis 2009-06-13 09:49

噢....盼望你保重身體, 多多休息,吃多d有營養既生果,湯水!

查到係咩病未? 依家有H1N1,出入都要小心d, 帶口罩呀, 一陣間唔覺易感染就麻煩啦..

最後,為你的健康祈禱,希望你的病可以快d好!!

檢舉
Pearl@man2009-06-14 11:09

依家我重要返去醫院覆診,醫生都未同我講過真正影響血壓高的原因.....
多謝你的關心,你自己也要小心身體