青山黛瑪@柔王丸 / 桜姬

噚日係糧頭,有啲錢又身痕,出0左MK睇0下有咩買,最後收穫有3樣0野~

1)青山黛瑪(青山テルマ)CD

青山黛瑪係近年出道0既歌手,曲風係我喜歡0既類型,唱功不差有啲似Misia,一首そばにいるね(中譯:留在我身邊)唱到街知巷聞,情形簡直就係日版喜帖街,上一隻處女作(上圖)都有買0黎聽,而且覺得唔錯,所以今次呢隻新大碟(下圖)繼續捧場,由於呢隻碟係情人節期間出食情人節條水,所以封面設計到好似朱古力咁(日本情人節係由女方送朱古力比男方,如果男方有意思就會係3月14日0既白色情人節回禮),而歌只得9首(重要有一首係之前大熱0既そばにいるね.......)就稍為有啲賺快錢0既感覺(又未至於係騙錢)。

今次主打歌係大っきらい　でもありがと(中譯:最討厭你 但也最感激你),保持到一貫水準,其他歌亦頗易入耳,所以呢隻碟亦算值得推介,如果佢繼續保持水準,應該係我繼大塚愛之後另一位會支持0既女歌手!

2)柔王丸 / 桜姬

近年已經好少買玩具,以前會經常買模型,但因為無心機更加無時間砌,所以我簡直係絕跡模型界,所以近年傾向買完成品,今次收穫係figma系列0既柔王丸(030)同桜姬(031),之前係雜誌見到會出已經決定會買,而figma系列0既公仔手工一向唔錯,其實figma系列我重有其他公仔鍾意,不過睇餸食飯唯有買0左最想買果一對先......。

好一對金童玉女

後記:係金融海嘯之下,我由以前一個唔多睇價錢,變成今日會為十元八塊遊晒全個MK格價0既人,以前我買日本歌手0既CD只會買日版,但而家如果有的話一定買行版,而噚日價格後CD價錢由$83~99,figma一對0既價錢由$380~428,我當然係買最平個價,咁又慳番$64啦!

本來心思思重想買BH5,不過見到行版係用美版做(一睇個game名係RE5就知),而行版(美版)因為咁會難玩啲,所以我應該會買日版,但個價錢真係...........,普通版$59x重貴過一隻行版限定$49x,而家咁0既時勢點買得落手呢!都係等佢跌番啲先再諗啦!