做人家嫂真不易

近來真係好忙好忙, 攪到update blog o既進度都慢咗添, 有時間巡完Blog之後, 已經唔夠時間寫Blog, 到寫完Blog及回覆晒之後, 又唔夠時間巡Blog喎! 不過007會盡量抽多D時間update個Blog及巡Blog, 希望大家唔好介意我o係一日內回應您們數個Blog啦......

越來越發覺做人家嫂真係唔容易, 爸爸媽咪我好掛住您o地呀 您o地永遠都係最錫我, 對我最服侍週到o既.......

嚟到加拿大我已經身心疲累, 嫁咗之後我要照顧老公o既一切, 有囡囡之後, 亦要顧及教育及照顧囡囡的所有, 每次返香港我都覺得自己好幸福, 最低限度, 有爸爸媽咪煮飯煲湯給我們吃喝........

但做人"家嫂"就真係完全唔係那回事了 唉!........

大家都知近來我奶奶嚟咗, 佢比較偏食, 食o野方面都令007感到頗頭痛........

例如 : 老人家D牙唔好, 食物硬些少佢已經唔係好想食, 呢方面我都可以理解 .........

但另方面, 奶奶又怕食物有肥膩感, 只要佢感覺到有油又唔想食........

食雞奶奶又怕食雞翼, 又唔多願食雞脾, 原因係怕肥, 所以只想食雞胸, 但雞胸確實又比較"鞋", 唔知點整至可以滑D及"林"D呢  各位Blog友有無方法提供呀 .......

豬肉有時買梅頭奶奶又會覺得肥, 但煮瘦肉有時舊瘦肉無咁靚, 或者007煮得唔夠好o既時候, 奶奶又會因為"硬"而唔食, 原來佢特別鍾意食"柳梅", 因為柳梅瘦而不硬......

雖然每次佢都無特別出聲, 都係因為我察覺到佢食一兩塊之後唔食, 問佢佢至講, 但始終一家人食飯, 無理由唔理會奶奶o既感受, 但同時我又唔想囡囡見到奶奶o既偏食習慣而有樣學樣, 所以就盡量諗D唔同o既食材嘞........

另一樣令007頭痛o既係奶奶喜愛小食多餐, 早午晚餐必須o既! 佢鍾意中途食些少甜品, 晚上亦希望有甜品, 但我, 008及囡囡則習慣於晚上食生果居多, 甜品只係我o地間中o既點綴........

最可怕o既係有時我煮少咗份量, 夠得008帶lunch返工, 又唔夠比奶奶第二日lunch, 本來諗住屋企隨手都可以整D野食啦! 我屋企中西式粉麵都有, 想食咩, 就煮咩啦! 點知問奶奶想食咩, 佢又話無所謂, 咁叫佢想食咩就自己煮啦, 我奶奶居然攞兩塊即食麥皮加D奶就當一餐, 但如果我諗埋煮埋比佢食呢, 佢又會照食喎, 係咪真係比佢激死  ........

所以奶奶嚟咗之後, 我用o既精神同時間都多咗, 加上囡囡放暑假, 唔使返學, 我要付出更多時間幫囡囡keep住上堂, 所以近來至咁忙.......

但我真係仲有好多o野想post比大家睇, 我會盡努力爭取時間update個Blog, 希望大家仍然會繼續上嚟探我啦.........