異國情緣 - 04/11/2009

尋晚天氣轉冷，第一刻的感覺是希望我既痴線鬼佬可以o係我身邊做我個大攬枕！

上星期先寫完鬼佬，今日又想講下佢！原因係我地剛剛先和好！上星期我罰完佢，前幾日到佢發圍！原因就係佢寵壞咗我，搞到我既壞脾氣控制唔到胡言亂語，結果佢兩日冇揾我！罰對方就如罰埋自己一樣，都唔明佢點解可以咁忍心！？！

兩日之後佢終於SMS再同我聯絡，初時仍然鬥氣，佢仲講到要放棄一樣，但我不甘示弱，佢唔在乎，我都無謂咁上心！但我地始終都係分唔開！因為除咗對方，大家都覺得好難再揾到一個咁痴線但又咁喜歡自己既人喇！

上星期二文迪媽返香港，每次文迪媽返嚟，鬼佬就好緊張，佢千叮萬囑叫我唔好o係文迪媽面前講佢壞話，我問佢點解？佢話怕文迪媽以為佢對我唔好，第時唔答應我地結婚既事！原來鬼佬真係好驚文迪媽！所以我有時都會同佢講，如果佢對我唔好，我一定同文迪媽講，到時文迪媽一定唔俾我嫁佢，

佢就話 " CRAZY, I'M A GOOD BOY LA!! "

而文迪媽返嚟之後都住我家直至UNCLE返嚟，每日我都同文迪媽周圍去，唔係約朋友食飯就係去Shopping，由朝去到晚，但鬼佬好乖，冇扭計又冇咋型，不過有時都會俾說話我聽，話我淨係掛住行街食飯，唔記得咗佢！鬼咩？！邊得閒同佢傾電話丫，夜晚返到去傾得幾句又唔得閒，但鬼佬聽到我把聲佢就已經OK！

文迪媽走咗之後，佢又問我文迪媽有冇問起佢，我話俾佢知媽咪話唔鐘意佢喇！因為媽咪返嚟兩次都見佢唔到，唔信佢喇！佢好緊張，叫我一定要同媽咪講佢好快就返嚟，到時會同我去台灣探媽咪；我心諗：聽住先啦！但我知道鬼佬好著緊媽咪鐘唔鐘意佢，係因為佢唔係中國人，佢怕不被接受，怕家人反對，我就會離開佢！記得自從媽咪同佢傾過計之後，佢成日問住媽咪好嘛？媽咪幾時再返嚟？台灣打風，媽咪有冇受影響？表現得好關心......每當佢留意到台灣既消息，就會同我講，仲話因為我媽咪住台灣，所以佢多咗留意台灣既野！聽到佢咁講，當然開心，沒想到一個大男人懂得如此關心別人！這是我欣賞佢既其中一個地方！而除咗文迪媽，我身邊既家人佢一樣關心o架！

呢兩日佢又病咗，我聽得最多既說話就係 " HONEY, I'M SICK ,I'M VERY SICK , I NEED YOU ..."

病既時候扭計係佢強項（不過我都係！），但我身在香港，可以做既野就只係氹下佢，關心佢多幾句，多佢幾啖！因為喉嚨痛，佢連聲都變埋，講野又走音，我笑佢成個女仔咁，跟住佢直頭扮女仔聲用廣東話講 " OH...禾hold瓜豬梨..."，我笑唔停咁話"OH HONEY,I LOVE YOU SO MUCH BECOZ YOU'RE A SEXY LADY BOY..."跟住一齊大笑！講到搞笑，我地兩個都有一手，所以唔嗌交唔鬥咀時，大家都氹得對方好開心！

待續...