奸人當道呀？！！

話說前晚、尋晚我都返夜，一心諗住今日可以開始我一連６日既假期啦！

點知，頭８點放工，返到元朗都係９點幾，正想買個蛋糕返去俾兩個仔食既時候，收到我上司既電話，話同事（正家長）因早前親人離逝，一直都瞓唔到，所以今朝好頭痛，想休息一日！（但佢已經抖咗兩日，係我返工啦！）

老實講，我唔係唔體諒人地孝順，親人離逝傷心過度，但我又覺得，俾你放多日假你又可以瞓到咩？同埋，你係一個專業有經驗既家長，係咪應該可以專業ｄ，唔好俾其他野影響你既工作呢？！

記得早在我初入職，已經有同事同我講呢個家長好麻煩，試過因為佢所謂既唔舒服，要我地替假家長連續返咗一星期夜，搞到有個舊同事頂唔住係家舍喊到豬頭咁！之後仲辭職唔做添！（我真係唔想做到喊囉！）

初初我入職，已經對呢位家長唔多好感，亦感覺到佢係麻煩人，點解？

或者我亞媽生得我有好強既第六感，新相識既人愈係特別多野講你知，即係話佢愈係想吐你講野，睇你係咩人！咁熱情既人，令人有點心寒！所以一直以來我對佢都避之則吉，不過衰就衰在我比較鐘意做有男有女或者係得男仔既家舍，佢做既係男女家，我又搞得掂班細路，所以前上司多數都編我返佢個層囉！！

之前都有過小過節喇！有次有個女就嚟走，個女本身家庭背景又好慘，所以我一心都係想個女走之前開心下，就私人帶佢去玩咗一日，呢個同事都唔知咩心態，竟然妒忌起來，仲俾面色我、我同事同個女睇！！！仲出言傷害個女！！嘩！！而家咩事呀？我又唔係要佢出錢請，我自己私人時間私人請個女去玩，都係想個女開心o者！有問題咩？？你自己都送套床單俾個女啦！！！個次嬲到我不得了，我仲係前上司面前講返件事出嚟！！！

呢件事之後，佢應該收到風我講俾上司知，所以從此之後佢就唔敢再咁衰格！更加唔敢再搞小動作！因為佢知我會係上司面前講佢！！

加上啱啱年頭時佢食肥雞餐，續唔續約好睇佢表現，所以佢就唔係好敢玩野！

到而家，佢約就續咗，仲要轉咗個新晉年輕上司，呢個家長就梗係一邊扮好人、一邊玩野啦！！！哼！！！但我唔會怕呢ｄ人，我一直『行得正企得正』，唔怕你搞搞震！

上星期開會，正家、替假先係會上大鬥法！好彩，新上司係有智慧型既靚女，睇落唔似得會聽晒佢地正家長話事！不過始終都係經驗淺，做呢行經驗唔夠，班老前輩又點紅點綠囉！

其實，我同班替假同事就好好感情，大家都真係Friend過打Band，有時見新上司好多野都未熟，又唔想佢俾班家長點紅點綠，所以好多時都硬住頭皮去講我地既睇法！雖然有ｄ擔心上司會以為我地好似教佢做野咁，不過如果唔講，我地硬食，真係好慘！希望佢明白啦！！

而家講完一輪，一陣又要返工喇！本來諗住今日放假約埋DoDo同另一位老友去捉隻西施，但而家冇辦法啦！唯有改第日啦！同埋今日返嚟都唔見隻西施，唔知佢去咗邊呢？唉～～～

各位，請祝我好運！！