長隆兩日一夜(Part I)

事隔兩年,終於再度踏足長隆, 但係班底就唔同左.

比較多間旅行社之後, 最後係中旅買套票:

日期: 26-27/6/2009 (五及六)

酒店: 新長隆酒店(狩獵房)+早餐

交通: 船(中港碼頭<-->蓮花港)

景點: 動物園+水上樂園(另加)+大馬戲(另加)

套票價錢: $1,010/人

洗費: $550/人(已包2午餐,1晚飯, 1小時按摩及1/2局bowling)

Day 1 (26/6/2009)

中港碼頭 > 蓮花港 > 新長隆酒店 > 水上樂園 > 酒店 > 大馬戲 > 麒麟中餐廳 > bowling > body massage > sleeping

搭最早7:50am 由中港碼頭去蓮花港既船, 去到蓮花港都差唔多10:30am, 而因為防範豬流感既關係, 係航行期間, 每位乘客要塡2份表, 第一份係個人塡寫既, 而第二份表係傳住嚟填, 好奇怪~~ 因為表上面有名同出生日期, 咁咪俾人睇哂囉?? 另外有船員為乘客量體溫,  到埗後, 又有入境人員上船再次為乘客量體溫,無發燒先可以離船, 如果體溫過高就要稍事休息再量體溫, 有人要量第二次, 但好彩全船都無人有事.過關後, 即刻排隊搭免費旅遊巴士去長隆, 免費巴士都好乾淨同舒服, 之前勁擔心搭唔到同無位, 但係原來都唔洗擔心, 雖然唔夠位坐, 但係可以企, 所有人都上到車, 我估如果太多人, 佢可能會開多班車, 但係企都幾陰公, 因為車程需時大半個鐘........

Remark 1:

a) 大帥過關既時候俾人查袋, 因為我將幾本雜誌放左落佢袋, 原來有某d刊物係唔可以入境, 埋岸既時候船上會有廣播, 大帥之後話我好嫁禍佢, 洗唔洗咁驚呀?? 最多咪沒收左d雜誌!!!

b) 差唔多開船既時候, 如果仲有vip位既話, 船員會勁廣播, 加$10升級, 而好處係可以量體溫先, 即係可以快d落到船, 但係如果坐得近船尾都會快d, 因為會由船尾開始量.

去到新長隆酒店已經係11:30am左右, 落車既時候, 捉住司機問佢由酒店搭免費巴士返蓮花港會唔會趕唔切, 有無試過上唔到船? 而司機話無試過, 同埋佢地係船公司既車, 即係會等埋,咁就放心哂~~ 入到lobby, 嘩~~~ 好靚呀~~仲有已經可以睇到白老虎~~~ 

與此同時, 已經好多人排隊check-in, 原本計劃係先放低行李, 去左水上樂園, 玩到6:00pm左右先check-in, 沖左涼就去睇大馬戲. 但係lobby 既服務員話有可能會有房, 如果未執房都可以俾鎖匙我地放低野, 咁緊係check-in放低行李係房好啦! 結果就排左大半個鐘先埋到櫃台, 但係答覆係未執好房, 要一,兩點先有鎖匙!!! 激死我!!! 阻住我地d時間玩大喇叭!! 之後唯有都係放低行李係lobby. 之後極速由酒店側門衝去長隆住客尊有通道入水上樂園, 但係我地入唔到,因為我地手持既中旅門票必須係正門取票, too bad.............. 最後要搭穿梭巴士去返水上樂園既正門先入得. 終於再次嚟到水上樂園, 感覺水上樂園既環境好左, 因為佢既更衣室有裝修過, 雖然未至於好乾淨, 但係已經比兩年前有改善, 而且開始既時候唔係好多人, 可能都有加分~~~ 整裝後, 先出發去巨獸碗, 兩年前都唔見lee個設施, 而評語係同大喇叭一樣咁正~~~~ 水上樂園既設施無增加, 但係依舊咁好玩~~~ 而且征服左垂直極限既三色梯!! YEAH~~ 其實當日係有夜埸既, 即係可以玩到9pm, 但係所有設施都係寫到5點, 而且我地都要趕去睇大馬戲, 所以都係5pm離場, 但係原來所有設施真係開到9pm!!!! 點解無指示架!!! 如果唔係我地會玩到6pm先走囉! 去返正門更衣室攞返野, 衫都唔洗換, 經返之前長隆住客尊有通道行返酒店, 需時5-10分鐘, 仲可以影返相添~~~

好方便~~

Remark 2:

a) 如果下次有機會去長隆一定要棟有夜場既日子, 最好係閒日, 因為真係好玩同玩多好多~~~ 當要走既時候就會覺得唔夠喉~~

b) 最好入住長隆酒店, 同係酒店買門票, 因為手持門票就可以直接係專用通道進出, 唔洗好似我要特登去正門, 而且可以當日無限次進出(我已經出示房卡, 但係佢話唔係長隆買飛,所以唔享有lee項優惠),另外, 係特定時段同設施,住客係可以優先, 真係有著數~~而且好近, 可以慳返好多時間, 如果換好哂衫先落去, 連locker$都慳返~~

係依依不捨既情況下, 返酒店沖涼換衫, 一開門見到間房真係好靚同好大, 仲有浴缸添~~~~(初頭以為無, 但可惜無時間浸, 係洗衫既時候d衫係浴缸入面浸過) , 張床又大又舒服, 真係有5星級既規格, happy~~~大家真係應該趁佢新,快d去~~~

整頓好, 約6:30pm 就出發去睇大馬戲, 而場館亦都好近酒店, 只需要行5-10分鐘, 由於上次既經驗, 知道早d到先可以坐前d, 所以大帥提議早D去, 果然我地如願坐係唔錯既位置, 但坐坐下先發現有長隆住客既預留區域, 早知唔洗咁早嚟霸位, 住客區都係7點左右先開始有人入坐, 但洗唔洗預約或者又要係長隆買飛就唔知啦! 而馬戲其實大致同上次差唔多, 當然有D新野, 雖然唔多, 但係都依然覺得好睇~~~今次仲俾我睇到穿崩位添, 好似一開場小丑吹喇叭無聲, 又有女表演者打唔到繩結, 但係都係空中盡量完成動作, 好專業呀!! 但唯一美中不足係觀眾們都比較吝嗇掌聲..........

Remarks 3:

a) 記住帶扇或者電風扇, 因為場館比較熱同唔通風, 好在今次去既時候有毛毛雨無咁熱~~

b) 盡量坐係近通道, 因為可以走得快d!!!