爸爸放大假

湊住兩個小朋友，真係忙咗好多，到而家網誌都只係寫到11月頭，有成3個幾星期既野未update，趁而家晴晴同詠詠都訓咗覺，要快手啲寫下先得。

2009年11月4日 至 2009年11月12日 爸爸放大假

陪月姨姨做到上個星期五(10月30日)，之後既時間，晴晴媽就要一個湊兩個，不過妹妹而家先一個月大，所以婆婆都會係日頭時間過黎幫下手。

而爸爸亦都好細心，一早安排好呢段時間先放大假，幫下晴晴媽過渡啱啱照顧兩個小朋友既日子。

妹妹滿月後，我地一家四口都有出過街，幾次都係去食飯，而且都有屋企人一齊去，咁通常晴晴就會交俾佢地照顧，我同爸爸就會主力照顧妹妹，所以問題都不大。

11月5日(四)

爸爸放大假的第二日，我地先第一次試下一家四口出街，兩個照顧兩個的情況。我同爸爸帶埋妹妹去學校接晴晴放學，然後去食lunch。不過，估都估唔到，呢個第一次，扭計既竟然係晴晴，我地估可能佢扭眼訓，食飯時喊足全程，氹又唔得，鬧又唔得，又唔肯講咩事。至於妹妹，食咗餐奶，唔係好肯訓，都有喊，要爸爸推住佢周圍行先肯收聲。

呢餐飯，媽咪就不停氹大女，爸爸就不停推住細女周圍行；呢個第一次，都真係幾狼狽。

原先仲諗住食完飯，行下商場，結果，兩個囡囡都唔聽話，咁梗係無晒心情行街啦！

11月6日(五)

今日晴晴學校放假，我地再接再勵，一家四口出動，出街食晏。今日順利好多，詠詠妹妹大覺訓，中途食咗餐奶，又訓過；晴晴家姐心情亦好好，好聽話，梗係啦，今日出街係同佢去訂生日會場地嘛。

11月7日(六)

夜晚出席姑婆既生日晚飯。

大姑媽同姑姐幫我地手照顧晴晴。至於妹妹，初初訓咗覺，到食完餐奶，就眼仔碌碌無訓過，我地仲怕佢會扭抱，點知又唔係喎，放佢係車仔，佢好乖乖無扭計。

妹妹食完奶，個咀仔食到紅卜卜。爸爸幫妹妹掃風。

妹妹食飽奶，放佢係車仔，呢晚無扭計。

11月8日(日)

出咗幾日街，呢日係屋企休息。

幫妹妹掛上床頭玩具，妹妹好似仲未有興趣，反而姐姐就好興奮。

11月9日(一)

晴晴家姐學校假期，我地plan好咗帶晴晴去迪士尼玩，爸爸係最初頭兩次有一齊去之外，好耐未join過我地喇！至於妹妹就放低咗俾婆婆照顧。

今日爸爸同我地一齊去玩，晴晴好開心、好興奮，仲成個導遊咁，話要帶爸爸去玩。

11月12日(四)

爸爸放假放埋今日，所以我地去遠少少，入沙田新城市廣場行街。

之前出街，都係出兩、三個鐘，今日算係出得最長時間既一日，出咗6個鐘。

係一田百貨BB部，妹妹訓緊覺，晴晴就坐係度睇卡通片。

今日第一次同妹妹用育嬰室設施。

第三期真係啱晒一家大細去，爸爸帶住晴晴去行反斗城既時候，我就推住訓咗覺既妹妹去行童裝舖。

仲有呢幾隻甲蟲，都吸引咗晴晴係度消磨咗大半個鐘。