初十 Update

Hi! 大家好! 我係初十, 好耐無見喇! 我6月6日已經滿3個月大, 媽媽話我大個女, 所以今次由我自己向大家報告我嘅近況。

媽媽依家好少叫我做「初十」, 通常都叫我做「初初」, 「亞初」或者「亞十」, 我就覺得「初初」個名最可愛喇。最近媽媽又幫我改多咗個新名, 叫做「無良初」, 通常係每朝媽媽瞓醒見到我時叫嘅。因為佢話我朝朝5點幾未夠6點就叫醒佢唔俾佢再瞓, 好無良喎！咁我又唔明喇, 乜天光唔係就應該起身嫁咩?

媽媽成日話我生得好細粒, 我依家3個月大, 身長(由頸到臀部)11吋, 尾長8吋, 三圍係9.5吋、10.5吋、12吋, 你地話我算唔算好嬌小呢?

我每日都過得好開心, 因為唔洗再困籠, 可以自由喺媽媽嘅房間內走動, 但係如果我食野嘅時候貓貓哥哥喺附近, 媽媽就會放我入籠裡面食野然後關住籠門, 因為貓貓哥哥非常為食, 成日都想辦法偷食我啲BB糧。

你地睇, 貓貓哥哥因為偷食俾媽媽困籠罰佢喇!

哥哥, 你叫救命都冇用嫁喇! 乖乖地坐3分鍾監啦! 不過貓貓哥哥似乎冇有怕, 放監出來下次又再偷食過!

貓貓哥哥好錫我, 每日都會同我喺房度跑來跑去玩追逐, 每次我同佢都玩到兩個條尾啲毛都豎起晒, 媽媽話估唔到貓貓哥哥成9歲已經貓到中年都仲咁活潑好動喎。

我最近發現屋企無端端會突然出現一粒小紅點, 唔知係咩來, 我成日想捉住佢, 但係次次都唔成功。每晚見到小紅點出現, 我都會好緊張嫁。

我成日都想同細細哥哥玩, 但係佢好似唔多鍾意我成日搞住佢, 每次我撲埋去佢度想同佢玩自由搏擊佢都走開, 不過我知道佢唔係唔鍾意我, 只不過佢比較文靜同細膽啲。

至於妹妹姐姐, 佢都仲係唔多鍾意我, 每次我行近佢又或者佢行經過我, 佢都會「fee」我一吓, 不過媽媽話其實妹妹姐姐對我已經好咗好多, 起碼依家佢唔會因為我喺房就拒絕入來, 又肯喺番媽媽張床上面瞓(前提係我唔好同佢坐得咁近), 又無再嬲媽媽, 同埋每日媽媽返屋企佢都會好似以前咁自動走入媽媽間房揾媽媽喇。唔知幾時妹妹姐姐至會錫錫我呢?

講吓講吓眼瞓添, 下次再傾啦!