荒謬到Ｏ嘴的事 (Dolce)

今次我想講一件「很荒謬」的事。

兩三個月前，有次坐巴士，坐在我後面的，是一位男生和他的朋友。我從他們的對話中，可以肯定這位男生在一間琴行教樂器的，但是他因為一件事而憤然辭職。

以下是我聽到他和他朋友聊天的內容：

男生：「有日教教吓學生，覺得好唔舒服，諗住撐落去，隔咗一陣，覺得好暈，於是同波士請假。」

佢波士：「你咩唔舒服？」

男生：「好暈」

佢波士：「我唔覺得你唔舒服喎！」

嘩！呢個波士副業應該係醫生，仲要係好權威同有透視眼嗰種，用眼就分析到員工係唔係病！當時的我聽到呢度，真的很想擰轉頭追問劇情發展！！

男生：「但係我真係頂唔住喎！」

波士：「你淨番三個學生咋喎，你教埋佢地先啦！休息室有好多藥，你去搵吓邊隻藥啱你食住先！」

真係聽到我Ｏ晒嘴，呢啲係乜野波士呀？咁荒謬嘅事都有？？員工病咗唔問候都算，仲要唔畀人走？？好離奇囉！！呢位男生最後好似堅持要早走。佢話覺得個波士好冇人性，所以辭職！！

我當時諗：如果個男生真係繼續上堂，可能會將病毒傳畀學生，或者佢真係撐唔住，暈低咗，呢個責任邊個負？？打工仔都係打份工啫，唔係賣命卦？？咁無良嘅人都有，我聽到都咬牙切齒！！！

呢個男仔件事，令我想起幾個星期前睇TVB一個專輯講《假自僱》，下次先同大家分享！