過去兩週的生活

嘩，眨吓眼就放咗兩星期假喇! 聽日就正式返工。 哈哈，真係有啲唔慣! 不過，我都要收拾好心情，因為又要迎接每一日o既挑戰!

前排應承咗曹Sir，佢叫我寫低呢兩週o既行程，同佢滙報吓，因為我呢兩個星期都好忙，我哋都無乜機會見面，所以我就襯假期最後一日，總結吓呢個愉快假期啦!

其實因為之前見board同工作o既關係，所以好多約會我都去唔到，甚至乎自己生日亦無得同一班好友慶祝。 所以我就襯呢段時間，約番三五知己出嚟食飯、聚舊。

首先我喺20/10陪我個好兄弟(德仔)去見board，呢日應該係科期o既最後一日，我一早就起身，約咗幾個戰友陪德仔去警察總部。 兄弟見完board之後，我哋就去咗飲茶，之後就展開愉快的一天。

21/10，我就約咗幾個志同道合o既好友去大球場，因為南華主場迎戰科威特球隊，果晚4萬座位全場爆滿，我真係好感動! 能夠成為當晚o既其中一份子，真係我o既榮幸。

23-25/10，呢幾日約咗我亞爸同亞媽返樟木頭hea吓，今次最大ｏ既得著係喺上面睇咗幾隻DVＤ，好彩無入戲院睇，如果唔係就蝕晒啲＄喇！　其次就係去睇中醫，因為我之前有啲傷風感冒，所以順便清埋佢啦！　25號當晚，我又去咗中學同學屋企，因為佢新屋入伙。 哈哈，當晚好開心，因為又見番啲中學同學!

26/10，我約咗個女性朋友食飯，因為之前大家工作各有各忙，約咗好耐都約唔到食飯，所以喺大家配合o既情況吓終於可以食到呢餐飯喇! 呢晚都過得好開心!

27/10，呢日係我同老死思傑、4仔老婆Ronnie、德仔老婆靜儀慶祝生日o既日子，仲有就係可以見到我一對契仔同契女。 當晚我送咗幾份好有心意o既禮物俾佢哋，老死德仔同我講:『雖然你咁做好娘，但係我覺得好warm!』 哈哈，呢句說話我一生都會記住! 最緊要係大家都開開心心，希望大家友誼永固!

就係呢兩份禮物喇，你哋話係咪好有心思先?

28/10，呢日約咗另一個好友保羅同佢老婆亞Jo食飯，因為好耐無見佢喇，所以一早就約咗佢呢日飯餐飯，吹吓水、聚吓舊。 喺度多謝亞Jo喺馬來西亞買俾我o既手信，咁梗係唔小得保羅喺加拿大買番嚟o既手信啦!

30/10即係尋日，呢日約咗幾個同事去海洋公園，我哋參加十月全城哈囉喂。首先要喺度唔該金金幫我買飛! Thank You! 呢次係我第二次玩哈囉喂，感覺依然好新鮮，加上今次去玩o既全部係玩得之人，所以非常好玩。 我哋不斷入鬼屋狂叫、同猛鬼影相、玩機動遊戲、睇show等。一行6人玩到凌晨12點先離開，雖然大家都覺得好攰，但係真係好好玩! 我哋仲決定咗下年會再去狂歡一番!

你哋嚟吓我幾受歡迎! (哈哈，其實我求咗班小妹妹好耐，佢哋先肯同我影!)

31/10今日，是日全線休息一天，因為病咗(傷風、咳加氣管炎)，由於聽日正式返工，所以都想盡快解決，於是今朝一早去咗睇醫生! 食咗藥之後就發覺好好多喇，不過今日要好好休息吓! 東亞病夫呢個朵用嚟形容我真係無錯!

好，滙報完畢!