小貪心

唔知大家朝早返工時, 會唔會遇到某些商品做推廣而周街派禮品的呢 MarkMark 就間中都會遇到的, 可能因為係中環返工既原因啦, 好多呢 d 推廣活動, 點都會係中環上班時間出現的, 好似早排甩既咖啡, 淋浴露, 某某品牌既試用待裝等等, 而今次就係以下呢隻 [head & shoulders 強健髮根] 洗頭水了, 仲好 hard sell 咁話男士專用的

因為 MarkMark 依家返工都會巴士到尖沙咀坐天星小輪到中環, 再行返公司的, 果日係尖沙咀一落車, 就見到靚女派緊呢個試用裝, 咁岩行過攞免費報紙, 見佢遞過來, 咪順手攞左放入公事包啦, 係船度打開免費睇時, 頭版已經係呢隻洗頭水既全版廣告了, 佢地真係捨得宣傳, 到左中環落船, 又有位靚女係正出口度派, 當然又唔客氣攞埋啦 , 點知行到落去近地鐵站時, 又有 3位靚女係度派喎, 可能佢地見無咩人埋去攞,  佢地 3 個就攞住好多咁係條街度, 係咁遞俾 d 男士, 一於要佢地接到為止, 就係咁, MarkMark 果朝就收到 3 包呢 d 試用裝了, 如果 MarkMark 面皮厚 d 的話, 可能仲可以攞多幾包添架