銀行奇遇

翻查BLOG 資料，原來前兩篇「香港地 -- 怪人怪事」已是講自己今次換樓奇遇，但一不離二，今次仲好離譜﹗

前文 已提及被地產欺騙我可借過渡期貸款TOP UP 三成首期，點知原來冇左呢樣野九萬個世紀，但又衰唔晒，憑住本小姐「良好」信貸紀錄，X行「無條件」借我三十萬大元周轉。

以為一切就緒，怎料，星期二律師樓送我奪命追魂 CALL，說仍未收到銀行應該要十日前送達的文件，我又再急CALL 銀行，銀行才於黃昏時間把文件交予律師樓，連累律師行二位同事要七一假期跟我處理成交事宜呢。

隨後律師行同事還提醒我轉賬尚欠的七十三萬元予公司﹗吓﹗七十三萬元，不是有三十萬過渡期貸款麼，應是四十三萬才對噢﹗沒辦法，假期CALL不了X行同事，但今天又要十時半前到律師樓簽好所有文件，迫於無奈摷畢生積蓄填補三十萬元，下午再上X行「找晦氣」。

哈哈﹗X行同事先給我的答覆是：「你今天才成交，我們打算下午才將三十萬送過去﹗」此時已是下午一時正，人家怎可四時三十分前做好所有文件，再將文件分別送回銀行及賣方律師樓？稍後X行再致電我，說其實是「送漏」了三十萬元，我還得走多趟到律師樓簽文件。X行更「皇恩浩蕩」的說今次佢地會「寬容」一次遲收該文件咁話﹗

我真係Ｏ晒嘴，我原意多付幾千蚊手續費借三十萬元，就是不想自己戶口完全乾塘，既然我已自行攪定了三成首期，幹嗎要俾錢你賺？既然我不要你三十萬元，我大可找交行做按揭，人家息口比你平噢﹗

送漏錢都夠膽死，係你地銀行錯在先，但仍「皇恩浩蕩」「寬容」律師行和我可遲交文件﹗

其實，之前有一單仲攪笑，X行一路同我講利息是 H+0.8 (CAP = P-2.75)，當日我又趕返工，簽好文件後再回家細看。吓﹗文件竟是 H+1 (CAP = P-2)。嘩﹗簡直係驚世大騙局，我再致電找晦氣，並申明我保留了前之討論細節文件，他才說：「係噃﹗我都冇留意按揭部同事咁寫添，我幫你了解一下﹗」大佬，我地呢啲婆仔星斗市民，真係要慳得一蚊得一蚊架，你地啲大商家就厄得一蚊得一蚊﹗

TMB