另類吸血疆屍片之饑渴誘罪

世風日下, 三個女人帶個男人去睇咸片, 哈.....

睇見個前題係咪好奇怪! 冇啦啦點解會有女人帶男人去睇咸片? 話說早幾日, 有朋友請咗半日假想去玩, 又有朋友想係返工前去享受下先, 仲有朋友見我地有嘢玩叫預埋佢, 咁我呢d閒人當然一叫即到。就係咁3女1男組合又成團。

我地女子組先約係中環集合行街買嘢食tea學下阿太生活先。我仲專程同佢地去蘭芳園食, 騐住下午個個返工唔駛迫。點知佢地唔食佢出名個d食物, 激死! 哈....不過, 今次去食又真係失色d, 個雞扒公仔麵d薑溶鬼咁小, 相比第一次冇咁好食! 唯一杯奶茶仍然好飲, 亦都係攪到我個晚見光光嘅罪魁禍首。

之後又好得閒咁四圍影下相, 最愛影d牆畫滿哂公仔, 好得意!

呢張冇啦啦鬧孔子! 咁又唔寫清楚害國家d乜? 似乎寫個人有問題多d!

到夜晚, 戲肉到啦! 正當我地3個女子話要去睇戲, 我揀日本賭片, 一個揀MJ歌舞片, 另一個要睇韓國吸血疆屍片, 係咁情形點揀? 我地將個波交比另一個男性朋友仔揀, 我地比咗日本妹, 鬼妹同韓妹佢揀, 神推鬼擁之下佢揀咗韓片, 即係標題呢套"饑渴誘罪"。 攪笑事就咁發生, 原來套片係講吸血彊屍, 由細到大都知所有彊屍片都有大胸性感女子同DD鹽花, 不過呢套仲另類。故事講神父參加一個病毒實驗, 因意外輸入神秘血液而變成嗜血及有神秘力量。 之後遇到兒時友人及其妻, 成為佢嘅轉捩點! 佢愛上友人妻子, 不單跟她有染還殺死友人。故事後期神父將友人妻亦變成彊屍, 而她相比神父更狠毒, 神父取血液是以不殺生為前題, 而友人妻用兇殘手法換取血液而得到快感。

聽完上述情節都知係一套帶點變態片, 影評聽聞仲有好高評價, 不過對我來講, 呢套係一套笑死你嘅變態咸片。由於d主角我地唔識, 佢地係戲內d表情真係好好笑, 好似佢個友人咁成日咸咸濕濕咁笑, 仲成日係床做埋d發姣動作! 另個神父發現自己有慾念就攞把鐵尺狂打自己器官。 又講佢同友人妻攪嘢, 玩埋啜腳趾, "lam"腋下等等, 仲有被殺友人成日好似厲鬼攝係佢地身邊, 但佢地仍然繼續攪嘢。睇見笑死咁變態都有!

另要恐怖都有dd, 個女主角開場真係有d古怪, d神情真係好抵死, 由最初好似好無知無奈咁, 但當佢變吸血彊屍後個樣又開始古古惑惑, 仲真係越嚟越靚。仲有神父吸血方法有界手腕吸啜, 有瞓係到嘆住飲, 仲有泵定慢慢嘆! 笑到肚痛! 臨尾仲有場神父露械, 死未!

一句講哂, 睇完男性朋友目無表情O咗咀咁, 我地三個女仔就瓜瓜叫變態! 哈....