真正殺手及魔鬼

今日我係一個殺手及魔鬼。

每年一度嘅展覽我都需要請一D PROMOTER, 當然係呢D暑假時間就會有好多小朋友得閒又想做廉價勞工, 當攞經驗又好搵吓洗費都好。由於呢D工唔會有太多, 好多人會打友情牌又用人士關係壓落嚟! 不過好老實位得咁多, 請得邊個, 所以舊年我地已經攪咗個選妃大會揀人。今年不例外, 除曾經做過可直接入選, 其他都要上嚟見下面了解下先。今年面試唔覺話有好精靈小朋友, 反而有D超自負(老實唔係因為人事原因, 睇怕都唔請。請咗佢出問題, 係佢家人瘀, 總好過話我地冇人情味唔比面, 哈!), 有D超貪靚(未出會議室係咁用手指梳頭髮), 另又有D累敗累戰 (上年全部人面試一致通過佢唔得, 今年再嚟, 雖然睇到佢進步咗但始終差DD, 今年唯有再令佢失望, 我都唔想打擊佢!) 最後成功請哂配額, 到時發生乜事真係天知囉! 祝佢地同我都好運啦........我唔想再係開展時炒人。

另一單係部門主管唔太滿意個新員工係今日落格殺令, 不過好好笑, 我都唔明平日佢巴啦巴啦, 一到請人又或炒人就變鵪鶉成個波拋比我。好....醜人衰人做做下會習慣, 我怕乜! 反正我知我一定HANDLE到呢D事, 我叫咗個同事入房, 跟手解釋佢係呢幾日工作表現唔符合我地要求(奇實我都唔知佢做過乜,只知佢有點怪怪!), 所以好抱歉我地決定要解僱佢, 之後講埋佢嘅人工係點計出嚟叫佢點數同簽收, 然後好多謝佢呢幾日幫忙同佢可以放工走人啦。雖然唔知佢幫唔幫到, 但我相信多多小小都有做D嘢, 禮貌上都要咁講。我唔會係D敏感時候去刺激人, 點知會發生乜事, 聽呢番說話起碼大家好落台。