Ocean Centre & 1881 Heritage XMAS 2009 隨拍

今次帶大家去睇OCEAN個邊D燈飾, 上一篇講過我第1次去時人山人海, 所以之後有朋叫閒日去影, 我又再去過! 閒日雖然人小D, 但仍然人多, 名店排滿人龍, 成街D人又好似唔駛做, 攞住一袋二袋, 真羨慕點解佢地可以咁有錢!

先睇下門口先, 今年係花仙子, 所以一夠鐘D閃閃波會打開變成花, 仲有聖誕歌播, 都幾靚!  係下面仲有一個比人捐錢入去水晶球同花仙子影相嘅拍照位, 不過, 當日私家攝影師冇隨隊, 其他攝影師又唔知會唔會影咗我個肥嘟嘟版見人, 唔太信得過, 都係放棄唔影囉! 哈...

呢個就係花仙子啦.....好可愛!

呢D係我第1次去時影, 見到下面奔墟咁, 驚未? 插針都唔入。

係拍照區想影花仙子全個樣都唔得

合照只可以係咁, 仲要等.......激死!

最後影多2張呢D影完都唔知係邊嘅相就走人。

但行入商場港威個邊反而有第2樣影, 係MIFFY兔呀, 留意呢張我頭頂有兔耳仔, 哈....

花仙子咁人山人海, 影呢度不失為另類選擇。

起碼可以近距離玩先! 仲可以移動D公仔就我!

呢排仲有新嘢, 海洋公園做PROMOTION, 整咗幅3D畫, 現場唔太立體仲好細!

不過, 影完又幾似。

反正玩開, 閒日又唔太多人, 影多張坐死聖誕老人先! 哈...

去開OCEAN, 順路過埋1881睇睇, 佢呢棵聖聖樹會變色, 個日仲撞正有D小朋友唱聖誕歌, 掛住聽冇拍VIDEO比大家睇, 好可愛架!

整多張高抄, 幾靚!

呢D唔知係咩? 剩知好似係 TIFFANY 攪, 見佢D粉藍絲帶裝飾就知!

行入去好似雀籠

睇真D上面綁咗好多許願絲帶, 如果靈, 我又整句大家一世無憂! 哈....益埋你地!

其他仲有呢D

我鍾意薑餅人