失業3個月零N日

差小小就會同魚魚攪關係............哈!

唔經唔覺唔做嘢已經有3個幾月, 悶未? 未喎! 反而開始適應, 依家日日瞓到黃朝百晏, 間中起身放狗仔。無聊仲發現可以係網上煲劇, 睇個天翻地暗, 換來一對熊貓眼加成面粒粒。還好我仲未比人睇死, 我仲頂得住, 冇收入又冇人包樣, 日常生活仲未受到重大影響, 呢樣我自己都估唔到。

講番搵工, 我冇放棄。繼續九唔搭八都SEND, 前後好似都有幾百封。最近有間打比我未見先問如果五日半都係大陸有冇興趣? 住廠宿舍包3餐。 聽完都係SAY NO算! 如果我冇家人我會考慮, 但始終家人唔多, 有事點番屋企。仲有長期係大陸咁我會冇哂香港D朋友。

另最近見咗一份朋友介紹嘅工。佢又唔知我BACKGROUND, 我又唔知佢公司背景, 咁就約咗出去飲茶見面, 仲要係星期日。 (飲住茶見工我都唔係第一次, 成日都咁怪怪!) 見完位婆婆、公公同佢小孫仔, (席間我知婆婆幾喜歡我) 跟住佢就再帶我去見佢公司同佢個仔, 間公司係做海鮮批發, 環境同我做開嘅公司完全兩回事, 有D似係街市魚檔番工, 要爬梯上OFFICE, 同佢仔傾落其實佢只係要一個JUNIOR嘅女仔已經可以做, 而我人工又較佢預定高, 最重要之前佢都見咗另一個女仔。 所以我都打定輸數就算我再減D, 都未必要我。果然夜晚婆婆CALL我個女仔CONFIRM上工, 我冇行! 冇所謂啦, 我當識多個朋友上咗一堂, 聽下婆婆講佢如何發蹟, 見識下另類公司都好! 繼續再搵過一份安安定定正常嘅工。

暫時我仍然係充滿希望, 我人又好又靚女又做得, 冇理由冇人請嘅! 哈....寫完呢句我自己都想笑!