失業2星期迭事

我都係唔習慣做大小姐, 唔駛做開始好悶! 都唔好玩嘅!

唔駛做呢兩星期, 第一個星期都ok, 真係當休息吓! 加上朋友飯局又多, 食到我好辛苦。最好笑人地唔駛做, 瞓到黃朝百晏, 幾開心! 我就越瞓就越出粒粒, 以前每日瞓6-7個鐘反而都冇事。無嘢做騐住陪狗仔去玩, 次次都比蚊咬到成身都係, 痕死我! 唔出去, 玩facebook happy farm, 又唔夠人早起, 成日比人偷哂d嘢!

仲好笑, 我走咗, 其實都有d黑心等睇好戲, 據我推測應該2個月後先爆鑊氣, 但結果似乎早咗。 呢2個星期係唔同渠道都有人同我講舊公司嘅事, 聽落都幾好笑! 我都話我有D運, 唔係呢2個星期真係有排我受。據聞上頭一向最憎女人駁咀, 一向有佢講冇人講, 但係展覽期間因工程問題比個女人鬧。 聽到都知大件事, 咁多伙計睇住佢點落台。 果然有人同我講, 之後佢嬲哂全村人, 話佢地冇義氣, 唔護主, 逐個省! 好彩我走咗, 唔係呢d蘇州屎一定係我一個硬食, 佢實話係我揸旗冇方, 攪到一鑊泡! 但聽佢嬲人原因都幾好笑, 狗先會護主, 唔通佢真係當哂d伙計係狗。講真, 上頭同人嘈, 佢地d細唔知頭唔知路正常都唔敢埋去, 做大個d亦深知上頭脾性, 基本上埋唔埋去幫口都會話佢地唔啱, 不過呢次咁嬲佢地估計唔到啫! 都可謂現眼報, 班友仔成日靠害, 今次到自己受下d莫須有罪。哈....

呢單嘢照估計佢有排嬲, 一定玩到唔玩, 要人認衰先會埋數比人。 伙計們就睇佢地可以做到幾狗去啱番佢, 聽聞以經有人做咗d小動作, 買d靚模寫真氹上頭, 不過應該唔掂。攪得掂就唔會玩唔簽票, 遲d先出糧比佢地, 哈......好彩我張票已經袋袋平安!

又聽聞好多人唔多開心蘊釀想辭職, 但我就會勸告佢地騐清楚, 自己走會冇好多嘢(雙糧同花紅可以冇哂!), 加上出面風大雨大, 真係唔駛養家先好騐。唔係似我都幾危險!