栗子包 - 附食譜

早排買o左 d栗子放ｏ左ｏ係雪柜本來諗住買ｏ黎煲湯用，　不過擺擺下都無用到，唔再用　ｏ既話就等發毛．．．於是拿拿淋用o左佢, 不過用 o黎整乜好呢??? 諗諗下用 o黎整栗子茸, 最初想用 o黎整蛋糕, 不過女人都係多心,善變, 最後 無整蛋糕, 用 o黎整 o左包包, 其實我自己一向都唔鍾意食粟子茸 o既蛋糕同包包, 覺得好甜...又好鬼膩, 所以一直都唔好呢家o野, 不過今次自己整o既茸子茸唔會太甜, 又唔會好膩, 都幾好味喎!!!  唔似街買果 d 咁不討好, 下次想整栗子蛋糕o既話都可以再試整下,

材料: 可做9個包.

栗子饀材料:

去皮栗子 180克

黃糖 48克

牛油 12克

淡忌廉 30克

饀做法:

A)將栗子放入水中煲淋, 煲淋後將水倒去, 用攪拌機將栗子打成糊再過一過篩做成栗子茸, 如無攪拌機, 亦可用篩直接將栗子篩成茸.

B) 牛油, 黃糖, 淡忌廉放在碗中用熱水座溶直至黃糖溶化.

C) 將栗子茸加入 B中拌勻即可, 然後放入雪柜備用.

麵糰材料:

高筋粉 270克

糖 52克

酵母 5克

奶粉 8克

牛奶 110克

鹽 2克

蛋 半隻

室溫牛油 20克

湯種 (高筋粉 15克, 滾水 70克, 將兩者拌成糊待涼後用)

掃包面用O既蛋半隻

包包做法:

1) 將酵母放入微O既奶中拌勻待五分鐘後用.

2) 將已過篩O既高筋粉, 糖, 奶粉, 鹽, 湯種, 酵母奶, 蛋放入大碗中拌勻再搓至光滑有彈性不黏手可拉出薄膜, 然後將牛油加入再搓一陣就可以放入已掃油O既大碗內蓋上保鮮紙發酵30分鐘(由於天氣凍, 我將麵糰放入以200度預熱1分鐘O既焗爐裡面發酵.

3) 第一次發酵完成. (可用沾上高筋粉的食指插入麵糰內驗試, 如插孔沒有縮回, 即表示發酵完成, 如向內縮表示發酵未夠, 請再發酵多一會, 如插孔向外, 即表示發酵過度) 發酵好將麵糰分成九份, 然後排氣再滾圓蓋上保鮮紙靜待15分鐘, 讓麵糰鬆弛.

4) 麵糰鬆弛後就可以將栗子茸加入及做型. 隨個人喜好做型, 再放上已掃油O既焗盤或防黏布上蓋上保鮮紙作最後發酵. 大概發酵45分鐘或兩倍大.

5) 發酵完成後, 在包面掃上蛋漿, 然後就可以放入預先以200度預熱10分鐘O既焗爐內焗10分鐘或包面變金黃就完成.

(無無聊聊整O左幾個做型. 哈...

包包好軟, 栗子茸亦好滑, 又唔會太甜, 剛剛好, 唔錯!!