大大大食會

尋晚我同幾位同學仲有同學O既仔仔又O黎打攪V同學, 哈...今次我地呢個大食會講明每人都要帶一樣O野食O黎, 最好係自己整O既, 不過唔識整O既就買現成囉. 我地總共六大一細, 大家跟住所見到 O既美食都俾我地差不多全部食哂, 大家唔好覺得誇張, 當你食到好食O既O野 O既時候, 真係停唔到口, 尤其是每一次去V同學屋企食O野, 每一次都會有驚喜!! 果種快樂.....真係好難形容, 總之就[嘩...聲四起] 真係好鬼開心 O架. Y同學你同你個囡囡又 O黎唔到, 真係又錯失 O左一個嘩聲, 笑聲, 吹水聲O既歡樂時光, 好好好可惜. 不過唔緊要, 我地新年會去W同學屋企繼續狂歡, 到時再快樂.

好啦, O係呢度都介紹一下我地尋晚O既美食!!

咁高興O既日子當然要DRINK一DRINK啦, 係V同學O既梅子酒梳打!!

我就唔係好識飲酒, 不過呢款酒就自己調較可濃可淡, 所以我淡淡地都無乜問題.

呢款芒果蝦什果沙律係令在場O既所有同學齊聲一[嘩]!! 點解呢....

最初我地只係睇到一盆新鮮雜果, 咁都無乜特別呀, 突然V同學拎出一杯新鮮打好 O既芒果汁, 乾淨利落咁倒O係新鮮雜果上面, 嘩................................果種驚喜, 有邊個能夠控制到情緒呀, 果聲O黎得自然又難以自控O既嘩聲, 真係好好聽. 哈....平時都係食用沙律醬撈 O既雜果沙律, 今次呢款用芒果汁撈 O既鮮蝦雜果沙律, 真係超正, 每個同學都食完再添呀, 最後係食清光 O既. 可想而知係幾咁好味呢.

跟住V同學再令我地好驚喜, 先睇睇個煲先, 明牌O野O黎O架, 哈... 好鬼靚仔, 不過更正 O既野O係裡面呀!!!!!

登..登...登.......自製磨菇湯. 平時出街食飯呀.....O係自己屋企飲到O既都係罐頭磨菇湯,但係V同學自製O磨菇湯真係超香磨菇味, 同一般聞到O既好唔同. 跟住飲一啖, 嘩..我又嘩啦...

好好味呀................................................磨菇湯裡面有好天然O既磨菇香味, 飲落去亦唔會杰達達, 清清地, 仲會O係湯度食到磨菇碎同磨菇片, 真係好正呀!!! 從未飲過咁好味O既磨菇湯. 真係多謝V同學O既好介紹, 我都要自己整返餐O黎飲下先得.

V同學O既意大利火腿拼哈蜜瓜 - 火腿唔會太咸, 不過如果哈蜜瓜再甜D就更好. 不過D火腿真係幾好味.

呢款係K同學叫佢媽咪整O既五香腐皮卷 - 伯有呢個腐皮卷又係好鬼好味, 平時我自己整O既都係魚肉卷, 今次食到伯有用豬肉整過腐皮卷, 味道濃好多, 又食到淡淡五香味, 最後都係食到一件都無得淨. 伯有好O野~~~~

又O黎返V同學O既鹽燒三文魚骨, 好脆好香口, 原本D三文魚碎撈D芒果沙律係好好食 O架. 甜中一點咸脆, 真係食到你停唔到咀呀. 絶呀!!

V同學O既自製薯蓉 - 係C同學仔仔要求O既, 因為早前佢食過V同學O既薯蓉話好正, 今次再O黎都一定要食喎. 所以V同學今次再整, 用新鮮薯仔所整O既薯蓉真係好好味, 最後都係食哂O架. 勁呀!!

呢款係W同學同C同學買O黎 O既泰式鳯爪, 係O係金不換買O架, 最初食面果D鳯爪..E...無乜味O既, 原本係D 汁沉哂底, 之後再食O既時候撈返D 汁就好好味呀. 不過買O左兩盒太多, 食唔哂呀.

V同學O既煎蠔 - 原來做法好簡單, 下次都等我自己試下整先得.

呢款唔記得V同學話係乜O野蝦, 又係做法超簡單, 但係味道好唔錯, 下次一樣要試整下.

V同學 O既蝦乾煮紹菜, 菜煮得好淋身, 蝦乾好好味, 清清地, 正呀.

食完餸之後大家都好飽, 俾個胃同個肚休息O左一大轉我地再戰甜品呀!!!我諗女人真係有兩個胃, 唔係點放到咁多 O野入去呀!!!

呢款係T同學自己整O既芒果布甸, 味道唔會太甜, 最叻係可以反轉倒出O黎呀. 我自己整果 D 倒唔出呀. 仲有呢個時候好小靚芒果, 要周圍搵O架! 真係有心之作呀!!

最尾呢款係我自己整O既綠茶紅豆芝士凍餅, 有睇開我個卜 O既朋友應該都見過好多次, 哈...因為我D 同學想食呢一款, 所以都係做返呢款囉. 我自己都覺得OK O架. 7寸蛋糕, 最後都係食哂O架!!!

我未試過整好個蛋糕之後, 由天水圍拎到V同學屋企, 大大話話都一個多鐘頭, 好彩個蛋糕無溶, 咁下次整好拎俾其他人試我都會有信心D, 安心D呀!!!

件件都唔細 O架....食完飽到上心口!!

尋晚真係好開心, V同學O既心思真係好佩服, 佢咁忙都抽空整好O野俾我地食, 仲要唔肯收返錢復! 真係多謝你呀!!!!!  好期待下次去W同學屋企大食會, 到時唔知大家又會整 D 乜 O野 O食呢??? 依家好諗定啦!!!