雞批 - (韓式風味) - 附食譜

今日無去街, 留o左o係屋企整o野食, 整o左我至愛 o既雞批, 不過今次個雞批改o左小小 o野, 個饀唔係用白汁, 我轉o左用韓國燒烤醃料醬o黎醃D內仲用 d 醬o黎煮埋 d 雞肉, 所以今次整呢個雞批係有 d 辣辣 o既韓國風味, 不過d 醬汁份量只係估估下, 整完之後食落覺得味道唔太夠, 如果再辣多小小, 再野味 d 就更加好喇!!

登........登.......呢個就係今日 o既製成品.

裡面係咁樣o架, 有雞肉同蘋果肉, 辣中一點甜, 食完唔會變阿[禪]

先醃雞肉.

材料: 雞脾肉一大件, 洗淨去皮切粒, 加入生抽, 糖, 生粉, 韓式燒烤醃肉醬醃30分鐘.

我係用呢款韓國燒烤醃肉醬. o係佳寶買o架.

炒到雞肉熟之後再加入韓式醃肉燒烤醬兩湯匙及少少鹽再, 再打個生粉水煮至杰杰地身, 然後加入已去皮切粒 o既蘋果(一至兩個)加入炒幾炒就可關火待涼備用.

之後整個皮. (可整6個雞批)

皮o既材料分別係: (參考韋太烹飪教室)

麵粉 160克, 吉士粉 2茶匙, 泡打 1/5茶匙, 室溫牛油 100克, 糖霜 30克, 蛋半隻.

先將牛油, 糖霜打至光滑.

然後分三, 四次逐少加入蛋漿再拌勻.

再加入已篩 o既麵粉, 吉士粉, 泡打粉輕輕拌至無粉粒.(唔好拌太耐)

用保鮮紙包好粉糰放入雪柜冰柜雪25分鐘.

雪好之後取出30克做底, 然後用叉[吉]出小孔.

將饀料加入.

然後取出28克粉糰用保鮮紙壓平做蓋. 然後掃上蛋漿, 用牙籤輕輕在批面畫上格仔紋.

放入預先以200度預熱 o既焗爐下層先焗8分鐘, 然後搬上中層以180度焗8-10分. 或批面變成金黃色即可.

焗好侍無咁熱就可以脫模進食. 好味 !!