年初二的歷史

一如以往既拜年，都係非常悶，全日最有趣就係佢姨媽住係灣仔舊樓，我們有機會親身體驗灣仔新舊交錯既景象。 謝安琪既囍帖街，真正既囍帖街還是第一次去，街兩旁都圍哂板，板上面畫左將來囍帖街既設計藍圖，原來都係以婚嫁商店為主。成條街，唯一可以證明佢就係囍帖街既，就只有利東街三個字既路牌。

之後去左石水渠街既藍屋，一間以木材為主要建築材料既三層高藍色屋仔，樓梯好暗，無燈，應該再無人住係Ｏ個度，因為每個門口都有政府物業既紙。只係剩下地下林世榮既醫館。古舊既舊建築，真係會令人對歷史有更多了解，亦令我更明白前人既智慧。同行既舅父話藍屋冇洗手間，到今時今日都仲係要倒夜香，而且，到今日依然有人係某處繼續這種工作。真係好難想像係今日既香港仲有咁樣既生活模式。

係哩Ｄ古跡旁邊，就係大大小小既高樓大廈，有頂樓係旋轉餐廰既合和中心，新和舊之間，一點都不協調。以前我對文化保育一點不關心，因為我覺得一切離我很遠，我一丁點相關既回憶都冇。但自從去了灣仔這一次，發覺原來一切並唔係咁遠，只係我一直冇去感受歷史。