開森就係咁簡單

首先要多謝一班朋友喺網上既祝福．

老實講May媽媽今年生日過得好開心，

雖然冇放煙花冇攞最佳女主角冇影全祼照，

只係同梁森同森爸簡簡單單同幾組好朋友食過幾餐飯打咗場台牌high過tea切過兩個生日蛋糕壓軸再同全家十幾人迫喺幾百呎娘家食咗餐簡簡單單既屋企飯，

但係就超開心！

只因簡單．

唔知係人老咗定因為梁森既關係，太過高調既生活節奏已經唔係咁啱May媽媽．

好似有日May媽媽突然問森爸：如果我哋離開香港，去一度人少偏僻但好靚既地方定居，你肯唔肯呀？

森爸諗都唔諗話：好呀！去邊？

May媽媽：好似日本沖繩或都澳洲咁囉！長住喎？冇晒香港啲朋友！冇晒香港啲玩具噃！

森爸：冇所謂呀！靜靜哋唔好咩！

雖然我知道森爸都係順口答May媽媽啫，但係就喺呢一分廿二秒已令May媽媽好開心喇！

好！喺度後補一個生日願望，就係希望大家都可以搵到各人心中既理想烏托邦！

P.S.

woody仔：認真架，搵日湊埋兩個B一齊出嚟威吓啦！不過May媽媽驚事後會俾間餐廳bad list我哋兩個勁B呀！！

winto666/M@M/小王子/ah Dee/abby：多謝晒！

hobowing：點解你可以食極都唔肥呢！

yeeming：所以每年既生日願望都一定有身體健康呢一樣架，因為冇健康，乜鬼野生意興隆，橫財就手都冇用呀！