魚毛第一次成功用厠所板

買咗個bb厠所比魚毛一年多,本來我諗住下年夏天至同佢介片,因為到而家問親佢有無砵砵,有無尿尿,佢都唔睬我,就算柯痾咗問佢,佢都擰頭話無!但係99同我亞媽成日就話我唔同佢介片,老公又話我懶,咁早排我嘅借口係大肚,唔可以成日同佢去厠所,更加唔可以成日踎低同佢抺地!早一,兩個月執嘢摷番個厠所出嚟,就放喺個廳度等魚毛同個厠所培養吓感情,開頭佢日日都拆散個厠所,然後砌番埋!過咗一排,有幾日我就等佢一瞓醒就同佢痾尿尿,但係每次都趕唔切未除片佢已經痾緊,又有一日我趕得切除片,放佢坐厠所,佢又話驚驚,縮埋攬住我唔肯痾,所以都係下年至介片!

雖然唔用嚟痾,都可以用嚟玩!

用嚟坐喺睇電視!

仲可以做枱仔食嘢!(無用過梗係可以啦,但係用過就.......)

今日同魚毛玩緊,佢突然定咗.....

(谷屎樣)

原來係谷屎,見佢谷咗成個時都痾唔到,就問佢去厠所痾好唔好,佢話好,我就淨係攞塊厠板同佢入厠所度痾囉!我就擔張凳仔坐喺佢側邊陪佢,佢就係咁叫我攞d沖涼玩具玩,為咗佢能夠順利完成,只有求其所好,要乜比乜,好快佢就順利完成,我望過係好長,長到睇唔到幾長,總算係順利,今日係成功嘅第一步!