妹妹剃頭~~~

因為妹妹D頭髮生得唔平均,兩邊密D長D,頭頂就少D短D!都幾肉酸吓!!

魚毛出世嗰時D人同我提起話BB剃咗D頭髮,會出得多D靚D,但係我嗰時覺得唔會囉,都無根據嘅!佢已經無乜頭髮,剃埋仲有嘅!!所以魚毛無剃到,但係一路都無乜頭髮又唔長!到上個魚毛因為耳仔上面D頭髮有D拮耳仔,所以先第一次剪髮,剪完之後真係好似生多咗密咗,所以妹妹就試吓睇吓係咪真係會生得靚D!!

早幾日同大姑奶提起,佢就幫我BOOK咗佢個髮型師同妹妹剃頭,仲話剃埋眼眉仲生得靚D,但係我覺得D頭髮唔靚剃咗佢可以接受,但係眼眉就唔好囉!!

今日工人姐姐抱住妹妹剃頭,頭仔細細幾分鐘就攪掂,跟住問我剃唔剃眼眉,我諗咗一陣,問佢條眉幾耐至生番出嚟,佢話一個月,算啦,橫掂都係,就剃埋佢啦!(妹妹咁細都唔打算同佢周圍去)跟住又問剪唔剪埋眼睫毛,吓!!!姑奶喺旁邊話剪咗生番出嚟會好靚,其實魚毛&老公家人全部眼睫毛都好長,不過算啦,又剪埋!成個過程都係兩,三個字完成!最後仲無收錢TIM,因為個髮型師話係佢自己話要同妹妹剃,大家又咁熟(我地都成日同佢BBQ,打麻雀),所以唔收錢,佢平時剪個髮要成$200蚊O架!

剃頭前!

剃頭後,我覺得都唔肉酸吖,仲幾清秀TIM!我同老公都覺得佢而家似個幾靚嘅師姑,連工人姐姐都話佢似阿彌陀佛,即係師姑!

唔知妹妹大個睇番,會多謝我定係.........