廣州遊

yahoo竟然俾中國電訊封左,害我之前一直開唔到個blog,而家終於可以如常update啦~等我寫返之前遊廣州的行程先~

去左廣州讀書咁耐,都無真真正正咁四圍遊下,其實廣州真係好大,好多地方我都未去過,偶然睇到雜誌"廣州一日遊"的專題,就心血來潮一看究竟!

路線: 陳添記－＞清平寵物街－＞沙面－＞珠江－＞塔影樓－＞郵政博覽館

第一站係已有30年歷史的老字號陳添記,全店只賣3樣小食:魚皮,艇仔粥,腸粉.可以由一個小小的檔仔賣到而家擴充到成條街,就知道老闆幾咁用心咁做果3樣食物.魚皮係冰凍的,又香又爽,食過的人都讚不絕口!粥煲得好綿好滑,用料十足,腸粉相對就普通一d,不過同樣好彈牙!

3樣加埋都只係30蚊,名副其實,平靚正!

入面仲有兩個鋪位坐滿人~~~

食飽個肚就行左20分鐘黎到清平街,之前只知芳村有個寵物市場,我地成日得閒無事就會去睇下狗仔,後來聽d客講清平都有狗賣,一直都想去睇下,今次終於有機會啦.....

所謂寵物街,原來只係一條小巷,街道兩旁擺滿狗籠同魚箱,所以又叫金魚街,果度環境確實唔係幾好,見到d狗仔都無黎精神想作病咁,好可憐...所以千祈唔好一時沖動想抱隻返屋企,去睇下就好了.不過睇見d金魚檔,好有童年撈金魚的味道啊~

穿過清平街,經過中藥海味市場,走過天橋,就來到沙面啦,沙面係一個充滿外國風情的景區,周圍都係好靚的英國建築物,果日就見到有十幾對新人係果度影婚莎相.不過對於澳門人可能就無咩感覺,因為都睇慣睇熟了~

沙面公園

有多少人知道這個基地的含意?

沙面其實就係珠江邊,沿海一直行過去,就見到遊珠江的上落船位置,去之前都諗住坐船遊返個來回的,因為都未坐過.不過去到見到咁多人排隊,都係算了..

一直行就見到塔影樓啦,原來相傳大鬧廣昌隆的故事就係塔影樓發生,而家已改建成由鬼佬打理的酒吧,其實無咩好睇,影張相就走人.

斜對面,就係最後一站郵政博覽館咯~我仲以為係間好多野睇的博物館,點知原來係賣郵政紀念品的地方,俾雜誌呃左添~

總結一日的行程,有得食有得玩有得睇,確實不枉此行,值得推介咖~hohoho