剪短d

天氣熱，帶左肥曲去剪毛。

好多人話狗係一種識得笑的動物，老實講，你估佢真係想對住你笑騎騎，Hea Hea Hea既咩，小學生都識狗只不過係度散熱咁啫。

人就係咁衰，擅長搵借口呃自己，賣過包搵笨兼搶錢既狗零食就當名正言順惡晒，明明佢地四隻腳走路，硬係迫d狗學Hand Hand，學兩隻腳行路。

我認我係孤寒，但我仍有點良心，寵物儀容上既事都係純粹滿足個主人而己，狗係唔會走去照下鏡，睇下自己潮唔潮，你試下佢唔熱的話，仲同唔同你笑住口伸晒脷Hea Hea，既然自己唔捨得成日開冷氣的話，不如就幫佢除左件Furs。

「今次點剪呀?」寵物店哥哥每次循例都問下，但真係好循例，每當見到佢d作品，隻隻狗都一模一樣樣，真係想問下究竟仲可以點剪。

「剪短d喇……剪短d……剪短d！」我隨口應幾句。

原來三句「剪短d」的威力確實係非同凡響。

狗係一種優秀聰明的動物，當你認識到有個職位叫「警犬」，而唔會見到有「警龜」、「警貓」的話，自然明白狗這種動物幾機靈古惑，原因牠們天生有當臥底的基因，熱愛扮野瞞騙。

每次我去寵物店領回肥曲，佢都係無乜反應，明明彼此認識，佢眼神又流露出我唔識你，鎮定又好戲，反觀其他三九唔識七既狗狗，明明我並非李太陳師奶，佢地又無爺爺裝出無比興奮既熱情，企圖用演技昆我帶錯返屋企。

曾幾何時，我會懷疑肥曲剪完毛後，佢既真身其實唔係一隻西施，可能係上格籠裡面果隻跳扎扎八哥，或者下格籠果隻自轉七百二史立沙，始終，對真正米飯班主的態度係唔應該咁有性格，比d反應都要啦。

「老細，我隻狗又去左邊呀?」明顯我又搵唔到。

「呢隻囉!」老細打開閘門。

我對住連個頭都剃得乾乾淨淨，咁鬼清爽既肥曲，爽到我都唔認得，最傳神的形容就係一個骷髏頭，自己不禁都要問句:「老友，識得個呵?」

嗯……無錯喇！認得隻牙，真係你呢隻崩牙狗。