謝謝你們的愛

首先要跟很多關心自己的朋友仔說聲對不起。
的確，在於我自己而言，今次只是小意外一樁。成日跌跌碰碰的我，已習慣了。
亦因此，沒有太注意自己。

話說星期四下午，我在公司不小心的被士多房的鐵門角割傷了右腳踭，雖然當時我睇住有血滴出來，都估計應該界得幾深，之不過，大家都認為沒什麼大不了，我亦不便理會。

到收工時，行落樓，一用力行路，便感到有d撕裂的感覺，當然啦，以我的硬頸，沒有多加理會，只知道唔應該繼續行路，於是走去跟羊羊食飯前後，我都是的士來回。

好了，返到家，正常沖涼，然後打開蓋在傷口上的化妝棉看看。死了，原來仲係流著血，而且睇到紅腫起來。於是乎，我自己試下包紮一下，希望瞓醒之後會無事啦。

到左尋日，起身時，睇下個傷口，死火，仲有流血跡象，心諗今晚仲要開工，
咁樣跛住來行路實在太樣衰了。跟住又諗起要著高跟鞋，左諗右諗，開始有d心知不妙。之但係，睇醫生又好唔夠時間，因為中午自己又約左對新人‧‧‧

就係咁，我又繼續當無事發生咁返工。
拖住個開工箱落樓落車，都經已幾困難。
下午臨近開工前，個傷口真係開始痛，尤其係腳踝一落地。
點算？諗到又係完成婚宴之後入急症室啦！
打左俾Alan問左d低能問題。其實係好想有把聲音去支持一下我自己。




提早去到開工地方。
換完衫，試下著埋隻鞋，死啦，出發前Andy幫我包紮的東西實在太厚，我要用力，
忍住痛之下，先至可以將隻腳硬塞進去。
d宴會部同事見到我隻腳，又見到我成個人硬晒，都走過來慰問。
成晚，一開工就六點半鐘律師證婚，跟住又不停咁影相，仲要玩祝福分貝機，我未試過行得咁慢。



係囉！企到11:30，我真係知死了，痛楚令我意識到，應該要去睇下醫生。
打左個電話俾藍藍，佢又喺旺角，諗住叫埋佢，就當幫我睇住個工作箱啦，
拖住件野入急症室會好異相囉。

咁啱Mandy一家三口又在TST飲完，又話要來睇下我。
在法國急症室內，我便一直比幾個人陪住睇醫生！
姑娘一睇我個傷口，就問我幾時整親？我答佢日幾前，佢都望住我笑笑口咁讚我幾忍得！
好了，Mandy同藍藍陪住我入去見醫生，醫生一望，又問：“幾時整親？”
“尋日。”
“咁點解依家先嚟睇？”
“我無諗過會傷得咁深吖嘛。”
“咁駛唔駛縫針？”
“依家縫就太遲了！”
“吓！咁點先可以唔再流血？”
“咪等佢自己唔流囉。”
“你近十年有無打過破傷風針？”
我諗梗時，Mandy經已幫我答左，叫醫生幫我打！
唉！我真係好驚打針！
仲要係喺佢地同埋晴晴面前，我仲驚！！
攪左一輪，終於攞藥走得。
藍藍死都要送埋我上樓。
-----------------------------------------------------------------------
事到如今，痛仲有d ，不過終於止血了，而果d咩抗生素，我會食晒佢，因
為我唔想再煩。
整親事小，煩親自己就最無謂。


止左血了，今晚洗完傷口，總算無咁恐怖啦。
好多謝身邊緊張自己的人，實在，我唔係太慣自己俾人圍住問候的。
之但係，給你們圍住的感覺，聽到你地緊張的聲音，我真係覺得好鬼溫暖。
我自己會小心ga la (我最怕煩 ga la)，煩到大家，真係非常之唔好意思。

我愛你地呀。