好耐無寫blog啦

呢排發生左好多事,令我無時間寫blog(其實係自己懶)，因為係呢排自己好累，無乜時間，所以就唔想寫blog

今日係寶寶十九個月大啊，時間真係過得好快，好快華仔就要番學啦，都好期待.....起碼婆婆唔洗咁辛苦先，呢個衰仔成日蝦亞婆亞公（但佢地又好開心咁比佢蝦），見到寶寶每一日變化真係好開心，就算點累都好啦，番到屋企見到佢又唔會覺得累

今日有少少唔係咁開心，仲有少少擔心，點解......

我係一個好鍾意狗的人，我以前養左一隻魔天使，佢個名叫徐long long，點解有呢個名，係因為佢黎到我地徐氏家庭，每次佢聽噹噹聲，就算佢係邊都會出現係我地面前，因為佢知道有得去街.....所以佢就叫呢個名，我好錫佢架，我好少去街，因為我好鍾意陪佢，但係幾年前，佢因病離開左我，我好傷心，到今時今日我都會心疼，由個日開始，我同自己講我唔會再養狗，因為無一隻狗能取代到佢個位置，但今日老公同我講屋企隻狗(叔仔同嘉琳隻狗b仔)病左，我放工都十一點，但番到屋企時我第一時間睇佢，家人話ｂ仔跛左，我係度睇，摸，搵出係邊度唔妥，突然間又諗住long long走時的情境，我好怕ｂ仔會離開....，雖然ｂ仔唔可以取代long long，但原來我都好錫ｂ仔.....不過我睇完佢後我感覺應該唔係咁嚴重，等明天叔仔放工同嘉琳帶ｂ仔去睇醫生，好快會無事