6月17日 - 第2日行程

行程：成都 ð西寧 ð茶卡

天未光就已經到左成都機場 熊貓！

大約09:15到達西寧，下著細雨，天氣比成都寒冷得多，我地即刻著多件衫，以免著涼就麻煩喇！今次接我地o既導遊是位女士，一步出閘口她便向每位團友獻上"哈達"即係好似頸巾咁果種，歡迎我地到青海省來，感覺都幾有VIP feel........haha！隨後便登上旅遊巴，領隊之前講過，留返第一行俾佢同導遊，仲有第二排當然係留俾高齡夫婦啦！其餘任我地坐，我地後生細女梗係包辦最後兩排啦！

正式踏進青藏公路了展開我地o既"奇妙之旅"，心情既興奮又緊張(怕高山症降臨係我身上)。然後向著中國最大o既鹹水湖 ~「青海湖」(海拔3230米)進發。途經「日月山」是文成公主當日離別唐土，嫁入藏邊o既交接點；落左車簡直感受到高原之荒蕪(大風到！)完全想像到當時大唐公主一定吃左唔少苦先黎到哩度。跟住好多拎住飾物&經輪 + 拖住羊/牛o既當地人就走埋黎一路跟住晒叫你幫襯。[之前領隊提過我地o向所有遊客區都要注意：如果你係對果樣野有興趣就一定要講價，無興趣就唔好理佢地，千祈唔好講完價之後又唔買，佢地會成班人圍你、吼你要你買為止，絕對唔係善男信女！但想同D動物影相就五蚊/次，當然都有價講。]聽左領隊咁講，我都會有興趣啦！

整個山頭都插著經幡，形成一片旗海。就係咁沿住一條"長"樓梯由前山行到後山........真係救命呀！我個頭o向哩個時候開始痛了，唔知係俾風吹到咁還是高山症黎料呢？

終於可以告別日月山，往一望無際o既青海湖去了。午餐o既地方都係o向青海湖旁邊，當然又有歡迎儀式(即獻上"哈達")，跟住到帳篷入面品嚐煲熱左o既羊奶，我非常猶豫飲唔飲好呢？因為驚左D酥味，點知檯面有糖、"青稞"果子碎同酥油係可以混入羊奶造成---酥油茶or (掙)粑。咁我就加左糖同青稞，試一試都幾好味，就一口氣飲晒成碗喇！點知道出事添

(1)藏民會用晒乾左o既羊糞做燃料       (2)當時o既情況         (3)好似油炸鬼o既野，好硬兼難食！

搞完一輪，原來係前菜，跟住過隔離開飯，食左幾啖飯個肚就開始黎料，咁就搵廁所，嘩！個廁所遠到~~~好彩耐力深，忍得住.......去到見到得四面牆、有兩個坑位、無水 [之前去過o既團友給我的忠告：1.唔可以望下面  2.唔可以差錯腳] 如果有得揀，我實唔會去啦！仲要辦事期間走個當地人入黎，唉.....搞到咩興緻都無晒！行到返去無耐就嘔到七彩 + 頭痛又發作！食飽之後(係團友們)就周圍影下相，接住仲有藏族歌舞表演。至於我梗係咩心情都無晒啦

隨後又要行幾個鐘頭車前往今晚住o既地方 - 茶卡，途中我又嘔左兩鑊甘，真係好~好~好後悔飲左D加料羊奶呀！到左入住o既青鹽賓館，已經唔會再有5星級的家，但值得一提賓館係用太陽能儲電，但過去幾日都係天陰下雨，所以無熱水供應，即係=無得沖涼同洗頭........算吧！都預左！不過最特別o向晚餐竟然先黎一煲久違o既"可樂煲姜"俾我地暖暖胃，當時感覺真係好WARM呀！今晚訓得唔多好，可能真係出現高山反應喇