簡單人生-----三個25年

痰盂集 (1993年)

                                             《三個 25年》
魯逢

       魯逢自知庸碌無能，一定唔能夠做的偉大事業，既唔能夠為國為民為社會。於是只有為自己。凡係認識我的朋友，相信都聽過我的謬論；我鍾意將一生分成三個階段，每個階段設定為二十五年(靜靜話比你知，以前我係定為二十年，搬紐西蘭之後，先至增長五年咋！)。

      頭一個25年，即係由出生一直到廿零歲啦，呢一個時段係學習期，即係猛咁吸收外間的知識，心無旁貸咁努力爭取一切應該知的，包括讀書寫字、學外文、研究電腦、電視、電影，凡一切可以學的都專心研究，深入剖析。仲要得好成績，并且要有沙紙(證書，即係畢業證明書)為憑，咁先至滿足。

      讀完書，就開始第二個階段，呢個階段就責任重大咯！就係搏命搵銀。凡係可以搵到錢的正當工作 (亦唔係偷、呃、拐、騙既工作)，都鍥而不捨咁拼命搵。對於銀紙的需求，絕不手軟，更唔論每日做十六個鐘頭時間，總之要達到豬籠入水。在呢個時段，可以話係最高難度的一段生命。不過唔緊要，呢段係黃金期，身體、心智都光芒四射，幾時都頂得順。

      至於第三個25年期，就係實現理想期，到呢個時候，一生的計劃都要落實啦，學識已經有的啦，銀紙又夠生活啦，咁樣在呢個最後階段，係唔係要從心所欲呢喂！即係由五六十歲開始就揀自己喜歡的工作去做，唔理搵唔搵到錢，總之係要合法同埋過癮。如果能夠咁樣完成一生的話，我相信都可以話此生無悔咯！至於你會問，結婚、運動、交友、娛樂，應該在邊個時段進行呢？等我話你知，呢樣係兼職的，因應個人需求，邊個時段完成都得，有本事的可在十五六歲果陣時娶老婆都得的，但一定唔好影響呢三個25年！！