心痛！！！

今朝一大早(其實都已經近11點)俾個電話嘈醒，原來係我表姐打o黎，話我知阿嫲交通意外出咗事，叫我代通知阿媽！呢啲事當然事不宜遲，而我媽原來亦收到通知，不過覺得未知發展成點，唔需要過份緊張！反正已經起身，而且意外嚴重o既話可能網上即時新聞有報導，一睇......心知不妙，再一次打俾阿媽交帶事件，等佢一返抵屋企就即時出去......

沿途上網、聽收音機已經發現死o既人數不停增加，但由於已經知道阿嫲已經被送去廣華醫院做緊掃瞄，心諗應該唔會有咩大礙啦！當抵達時，佢已經由掃瞄房轉咗上深切治療部，而我啲親戚有啲都出咗去食嘢，只係留返其中一個姑姐同表妹在場等候！

等咗一陣，一名醫生走出o黎同我哋講解情況並叫我哋作好心理準備......好難受！眼淚都已經有啲唔多受控制，但我哋幾個亦要分頭行事周圍打電話通知未到場o既親人，而我打俾我細佬之際我都真係已經喊到出唔到聲，好痛！！過多一陣，附近o既親戚都已經返到醫院，亦喺差唔多時間醫生再一次出o黎，叫我哋入去見阿嫲o既最後一面！

遠遠望見，我都唔敢走近去望，亦唔識得叫佢，心只係覺得好驚、好痛！！除咗喊之外，我唯一可以幫手做o既就係跑去我妹公司叫佢過o黎，當時o既我一定勁異相，不過都係唔理得太多！返到醫院再一次入去，我都唔多敢望，但事實上我亦知我以後唔可以再望多佢好多次喇......

直到4點幾，已經無其他嘢可以做，而最終我爸亦趕唔切去醫院見佢(因為屍體越放得耐會越唔好)！離開醫院，求祈喺附近食咗啲嘢，我阿媽、阿爸同哥都返慈雲山，而我自己亦要拎部手提電話去整，中間等待o既時間(一個鐘真係好漫長！)，感覺真係好倦！無意識咁行咗一個商場，最終決定行去戲院上o既大銀幕前等睇新聞報導，當中諗咗好多好多以前細個o既片段，而當中更唔知自己已經喊過幾多次......