玩具展

原本今日請咗半日假，打算去玩具展行下幫我妹買架BB車，但朝早起身諗諗下，心大心細又想過深水埗配返幾粒水晶石整返條鏈，所以就叫個同事幫我請埋下午！

十點半過到會展，L俾咗張pass我入場，等我食埋早餐之後就帶我行咗幾間鋪，但啲車都唔算太啱心水，由於佢係返工時間，唔可以陪我太耐，我就去咗另一個Hall自己睇，由於車o既數量實在唔少，睇到我眼花撩亂，最終都係要call L陪我俾意見，睇咗幾間又試咗幾架，唔係個樣差啲就係啲有啲parts唔多穩陣，最後唔覺意行過一個corner位，竟然俾我哋發現到有啲筍嘢，外型OK又輕身，仲要只係$150，唔駛諗即刻俾錢走人！走嗰陣L都心郁郁想買架俾佢家姐，所以趁買飯又走咗一轉，仲俾佢執到架更好o既嘢，扶手可以隨意較向前或向後，價錢仲一樣添！！

買完車返佢鋪頭坐咗陣，佢哋食飯時我又自己一個周圍行，行足兩個Hall，始終忍唔住手買咗個$30 o既beach volley，L話唔抵，不過我就覺得OK，轉頭又行咗陣，今次又俾我喺佢附近o既鋪執咗件$80 o既孭帶，睇落仲好新淨添！

由於賣volley嗰間鋪無波針幫我放氣，當我行過另一間賣波o既鋪，咁啱又俾我睇中咗一個小足球($20)，初初諗住送俾K個仔做生日禮物，不過越睇越鍾意，最後決定據為己有！仲問埋個巴藉叔叔借支波針o黎放晒所有波o既氣添！

3點幾會場啲鋪有好多都開始pack箱，我除咗間中留喺L鋪頭吹水，又會間中同佢近近地左右咁周圍行下望下，哈~ 咁啱行過一間鋪，個sales撩我哋買淨返張BB床(雖然拆開後發現少咗2粒螺絲帽，但五金鋪一定配得返)，話$50賣俾我哋，個價錢真係吸引到爆囉！反正屋企人講過都想要多一張床仔，所以都唔駛諗太多！

4點好多鋪都已經清場，但最終都俾我發現有間鋪有膠墊賣(不過遲咗一步，有set幾靚o既俾人拎咗)，而淨返o既得返$10有4塊尺半乘尺半咁大嗰種，所以我將最後8塊都買埋！

由於買得實在太興奮，加上咁〝滿載而歸〞都只不過係$350，所以最後都無去其他地方，搬晒啲嘢返屋企先算！！